काठमाडौं। यसअघि ३ दिन लगातार बढेको सेयर बजार आइतबार भने घटेको छ । यस दिन नेप्से सूचक २१.१२ विन्दुले घटेर २६०९.५८ अंकमा आएर अडिएको छ । ५ अर्ब ४७ करोड रुपैयाँभन्दा बढीको सेयर कारोबार भएको छ । २ वटा कम्पनीमा सकारात्मक सर्किट लागेको छ । ३ वटा समूहका सूचकमात्र बढेका छन् । फाइनान्स समूहको सूचक सबैभन्दा बढी घटेको छ ।
थोरै बढेको मौकामा अल्पकालीन कारोबारी हावी हुँदा सूचक दबाबमा परेको हो । बजार बढ्छ भन्ने आत्मविश्वासमा कमी भएकाले पनि अलिकति वृद्धि हुने बित्तिकै ट्रेडरहरु हावी हुने प्रवृत्ति बढेको हो । यसअघि लामो समय नेप्से घट्यो । त्यत्तिकै समय साइडवेज प्रवृत्तिमा पनि रह्यो । यसकारण तत्काल बजार माथि गइहाल्छ भन्ने आत्मविश्वासमा कमी देखिएको पाइन्छ । यसैकारण ३ कार्य दिन बढेको बजारबाट प्रोफिट बुक गर्ने हतार भएको देखिन्छ ।
अहिले नेप्से सूचक २६ सयको लेबलमा छ । यसअघि नेप्से २५ सयको तहसम्म झरेर पुनः २६ सयको लाइनमा उक्लिएको हो । अब यो लेबलबाट पुनः मथि जानका लागि सूचकसँगै दैनिक कारोबार रकममा पनि तेजी देखिंदै जानुपर्ने हुन्छ । तर बजारमा अहिले नै कारोबार रकममा खासै वृद्धिको संकेत देखिएको छैन । यस्तै, नेप्से २६ सयको लेबलबाट माथि जान पनि सकेको छैन । यसकारण कतिपय लगानीकर्ता अन्योलमा समेत परेको पनि देखिन्छ ।
सेयर बजारले निश्चित गति लिन नसकेपछि धेरैजसो लगानीकर्ता ‘वेट एन्ड वाच’ को मुडमा पनि रहेको पाइन्छ । कतिपयले किनिहाल्ने वा बेचिहाल्ने दुवै निर्णय गर्न नसकेको देखिन्छ । यसकारण पनि अहिले दैनिक कारोबार रकम औसतमा कम भएको हो ।पुसको दोस्रो साता सुरु भइसकेको छ । अधिकांश कम्पनीले साधारण सभा आह्वान पनि गरेका छन् । बुक क्लोजको सूचना आइसकेको छ ।
अब पुस मसान्तसम्ममा अधिकांश कम्पनीले साधारण सभा गर्दैछन् । साधारण सभा सम्पन्न भएको केही समयपछि सूचीकृत कम्पनीहरुको धमाधम लाभांश सेयरधनीको खातामा पठाउन सुरु हुनेछ । यता, यसअघि लामो समयसम्म बजार घट्दा भाउ सस्तो भइसकेको छ । यसकारण सस्तो मूल्यमा लगानीकर्ता आकर्षित हुने अनुमान गर्न सकिन्छ । अझ वाणिज्य बैंकहरुको सेयर मूल्य निकै सस्तो देखिएको छ ।
त्यसो त केही दिनयता यो समूहमा अलिबढी चहलपहल पनि देखिएको छ । बजारले रफ्तार लिनका लागि यो समूह अघि बढ्नुपर्ने जानकारहरु बताउँछन् । यद्यपि, लगानीकर्ताको अपेक्षा अनुसार भने अहिलेसम्म अझै तेजी आउन चाहिँ सकेको छैन ।
त्यसो त लामो समयदेखि हाम्रो बजारमा फन्डामेन्टलभन्दा पनि कम पुँजी भएका कम्पनीहरुमा कारोबारीहरु लागिरहेको देखिन्छ । यसबाट जोखिम पनि सोही अनुसार बढेको छ । वित्तीय अवस्था निकै नाजूक भएका कम्पनीहरुको सेयर मूल्य आकासिंदै आएको छ । तर तुलनात्मकरुपमा सबल र संस्थागत सुशासन राम्रो भएका कम्पनीहरुको सेयर भाउ भने निकै कम छ ।
यद्यपि, कर्णाली डेभलपमेन्ट बैंको घटनाले अब लगानीकर्ताहरु आधारभूत अवस्था मजबुत भएका कम्पनीहरुतिर मोडिने सम्भावना पनि देखिएको छ । तर अहिलेसम्म स्पष्ट संकेत भने देखिसकेको छैन । यसअघि बारम्बार प्रयास गर्दा पनि नेप्सेले २७८० को विन्दु पार गर्न सकेन । तर बैंकिङ समूहले लीड गरेमा उक्त अवरोधलाई पार गर्न सक्ने सम्भावना रहन्छ । त्यसो त पुस दोस्रो सातासम्म पनि बैंकहरुले खासै कर्जा प्रवाह गर्न सकेका छैनन् । वित्तीय प्रणालीमा अधिक तरलताको अवस्था छ । ब्याजदर पनि निरन्तर घटिरहेको छ ।
यता, आम लगानीकर्ताले भने सबल वित्तीय सूचक भएका, लगातार लाभांश दिएको वा दिन सक्ने, संस्थागत सुशासन अब्बल रहेका कम्पनीहरुमा सकेसम्म लामो समय होल्ड गर्ने ढंगले लगानी गर्न अनुभवीहरुले सुझाव दिने गरेका छन् ।
यस दिन ३१६ कम्पनीको १ करोड १० लाखभन्दा बढी कित्ता सेयर कारोबार भएको छ । २६ करोड रुपैयाँभन्दा बढीसहित कारोबार रकममा प्रभु बैंक अग्रस्थानमा रहेको छ । यसैगरी, दोस्रो र तेस्रो स्थानमा क्रमशः जानकी फाइनान्स र एनआरएन इन्फ्रास्टक्चर एन्ड डेभलपमेन्ट लिमिटेड परेका छन् ।
