काठमाडौं। पछिल्लो तीन साता लगातार घटेको सेयर बजार सूचक नेपाल स्टक एक्सचेञ्ज (नेप्से) गत साता भने सकारात्मक रह्यो। मंसिर १६ देखि मंसिर २० सम्मको पाँच कारोबार दिनमा १३ अंकले घटेर २७३४.९३ बिन्दुमा रोकिएको नेप्से मंसिर २३ देखि मंसिर २७ सम्मको पाँचै कारोबार दिनमा ५२ अंकले घट्यो। दुई सातामा ६५ अंकले ओरालो लागेको नेप्सेको घट्दोक्रम त्यतिमा मात्रै सीमित रहेन।
पुस १ देखि ४ सम्मको चार कारोबार दिनमा पनि नेप्से ८५.४७ अंकले घट्दै २५९६.८२ बिन्दुमा रोकियो। यसरी, मंसिर १६ देखि पुस ४ सम्मको तीन सातामा तीनै साता घट्दै नेप्से १५२ अंकको गिरावटका साथ २५९६.८२ बिन्दुमा खुम्चियो। तर, तीन सातामा देखिएको डेढ सय बढी अंकको गिरावटपछि भने बजारमा केही सुधार देखियो।
पुस ४ मा २५९६.८२ बिन्दुमा रहेको नेप्से गत साताको चार कारोबार दिनमा एक दिन घटेर तीन दिन बढ्दै ३३ अंकको वृद्धिका साथ २६३०.७१ बिन्दुमा पुगेको छ। खासगरी, पछिल्लो केही सातादेखि बीआरआईलाई लिएर सत्तारुढ दल नेपाली कांग्रेस र नेकपा एमालेबीच खटपट सुरु भएको र सरकार ढल्न सक्ने किसिमका हल्ला फैलिनेक्रम जारी छ। त्यसमाथि, प्रधानमन्त्री केपी शर्मा ओलीलाई छिमेकी मुलुक भारतले भ्रमणको निम्तो नदिएको विषयसँग जोडर पनि सरकार ढल्ने चर्चा चलिरहेको छ।
पछिल्लो समय यी र यस्ता किसिमका हल्ला चलाएर बजार घटाउने काम भएको लगानीकर्ताहरु बताउँछन्। नेपाल सेयरधनी संघका अध्यक्ष घनश्याम पाण्डे केही दिनदेखि लगातार चलेको सत्तासमिकरण फेरबदल हल्लाको असर बजारमा देखिरहेको बताउँछन्। ‘विगतको टे«न्डलाई हेर्ने हो भने यो बजार बढ्ने समय हो। यसअघिका वर्षहरुमा पुसको दोस्रो÷तेस्रो सातासम्म बजार बढ्ने गर्दथ्यो,’ पाण्डे भन्छन्, ‘तर, यस वर्ष भने केही साता अगाडिबाट नै बजार घट्नेक्रम सुरु भयो।’
हाल हल्ला चलेजस्तै यदि बजारमा सत्ता समिकरण फेरिए पनि सरकारको नेतृत्व एमाले र कांग्रेसमध्येकै एक दलले गर्ने भएकाले त्यसमा त्रसित हुन आवश्यक नभएको तर्क पाण्डेको छ। एमाले पुँजी बजारको हितमा काम गर्ने भनेर चिनिएको दल भएको र कांग्रेसले पनि उदार पुँजीवादको वकालत गर्दै आएकाले पुँजीबजार विरोधी नीति आउलान् भनेर डराउन नपर्ने उनको भनाइ छ। बजार तीन साता लगातार घट्दा पनि कारोबारमा भने खासै संकुचन नआएकाले यसलाई सकारात्मक मान्नुपर्ने पाण्डे बताउँछन्।
हुनत, सूचकमा धेरै अंकको उतारचढाव आएपनि कारोबार रकम भने करिबकरिब उस्ताउस्तै हाराहारीमा छ। गत साता मात्रै नेप्सेमा कुल १९ अर्ब ९ करोड रुपैयाँ बराबरको कारोबार भयो। अघिल्लो साता पनि १८ अर्ब ९९ करोड रुपैयाँ बराबरको कारोबार भएको थियो। बजार लगातार घट्न सुरु गर्नु अगाडिका साताहरुमा भने नेप्सेमा तुलनात्मकरुपमा बढी कारोबार भएको थियो। अहिले अधिकांश सूचक बजारको पक्षमा रहेको र सँधै हल्लाले काम नगर्ने भएकाले पनि बजार उकालो लाग्ने सम्भावना नै बढी भएको अध्यक्ष पाण्डे सुनाउँछन्।
‘बजार केही सुस्ताउँदैमा अतालिनुपर्ने अवस्था छैन। दुईचार दिन संकुचन आएपनि नेप्से उकालो लाग्ने सम्भावना नै बढी देखिन्छ। अहिले वित्तीय सूचक बलिया भएका र फन्डामीन्टलमा आधारित भएर लगानी नगर्दा पनि बजार बढ्न नसकेको हो,’ अध्यक्ष पाण्डे भन्छन्, ‘बलिया र बजारमा ठूलो हिस्सा ओगटेका कम्पनीतर्फ आकर्षण बढेमा सूचक र कारोबार धेरै माथि पुग्छ।’ उनले कमजोर कम्पनीमा लगानी गर्नु बढी जोखिमपूर्ण भएको महसुस लगानीकर्ताले गरेमा त्यसको प्रभाव बजारमा तत्कालै देखिने बताए।
खासगरी, नेपाल राष्ट्र बैंकले पुस १० गते कर्णाली डेभलपमेण्ट बैंकलाई ‘समस्या ग्रस्त’ घोषणा गरेसँगै बलिया कम्पनीमा लगानी गर्नुपर्ने चर्चा पनि चलिरहेको छ। बिहीबारदेखि कम्पनीको दोस्रो बजारमा सेयर कारोबार रोक्का भएको छ भने लगानीकर्ताको लगानी पनि के हुने भन्ने अन्यौल सिर्जना भएको छ। यसैको प्रतिक्रिया स्वरुप गत साताको बिहीबार बैंकिङ समूहका १९ वटै कम्पनीको सेयर मूल्य बढेको थियो भने विकास बैंक समूहका १५ वटै कम्पनीको सेयर मूल्य घटेको थियो। आगामी दिनमा पनि यी विषयलाई लगानीकर्ताले कसरी लिन्छन् भन्ने विषयले नै बजारको यात्रा तय गर्ने देखिन्छ।
-1743570672.jpg)
