दैलेखमा पेट्रोलियम पदार्थको अन्वेषण अन्तिम चरणमा

समाज

गृहपृष्ठ
समाज

दैलेखमा पेट्रोलियम पदार्थको अन्वेषण अन्तिम चरणमा

क्यापिटल नेपालबिहीबार, पुस ११, २०८१

दैलेख। जिल्लामा जारी पेट्रोलियम पदार्थ अन्वेषणको काम अन्तिम चरणमा पुगेको छ। खानी तथा भूगर्भ विभागका अनुसार बुधबारसम्म ३ हजार ९३० मिटर ‘ड्रिलिङ’ सम्पन्न भएको छ। अब ७० मिटर मात्र खन्न बाँकी छ।

दैलेखको भैरवी गाउँपालिका १ जलजले क्षेत्रमा गत वैशाख २८ गतेदेखि पेट्रोलियम पदार्थ र प्राकृतिक ग्याँस अन्वेषणका लागि ड्रिलिङ प्रारम्भ भएको थियो। विभागका पेट्रोलियम परियोजना प्रमुख गणेश नाथ त्रिपाठीका अनुसार यसै महिना ड्रिलिङ सक्ने लक्ष्यका साथ काम भइरहेको छ।

चिनियाँ प्राविधिक टोलीले पहिलो चरणमा ‘सिस्मिक सर्भे, जियोलोजिकल सर्भे, म्याग्नेटो टेल्युरिक सर्भे र जिओ केमिकल स्याम्पलिङ सर्भे’ तोकिएकै समयमा सम्पन्न गरेको थियो। ड्रिलिङको काम पनि निर्धारित समयअगावै सम्पन्न गरिने उनले बताए।

चीन सरकारको दुई अर्ब ५० करोड अनुदानमा यो परियोजना कार्यान्वयनमा छ। परियोजनाअन्तर्गत ड्रिलिङका लागि भैरवी गाउँपालिका १ जलजलेमा ४५ रोपनी जग्गा अधिग्रहण गरिएको थियो।

चिनियाँ र नेपाली गरी ८० जनाको समूहले उत्खनन गरिरहेको छ। विभाग, चाइना जियोलोजिकल सर्भे तथा सिबु ड्रिलिङ इञ्जिनियरिङ कम्पनी परियोजना कार्यान्वयनमा व्यस्त छन्।

प्रकाशित मिति: बिहीबार, पुस ११, २०८१ ११:२३

प्रतिक्रिया दिनुहोस्