बजेट अभाव हुँदा धनगढी-दिपायल सडकमा पुल निर्माण अलपत्र

अर्थतन्त्र

गृहपृष्ठ
अर्थतन्त्र

बजेट अभाव हुँदा धनगढी-दिपायल सडकमा पुल निर्माण अलपत्र

क्यापिटल नेपालमंगलबार, पुस ९, २०८१

काठमाडौं। धनगढी-खुटिया-दिपायल द्रुतमार्गमा निर्माणाधीन आठ पुलको काम प्रभावित भएको छ। धनगढी-खुटिया-दिपायल द्रुतमार्ग आयोजना कार्यालयका इञ्जिनियर दिनेश रैखोलाका अनुसार बजेट अभावमा आठ स्थानमा निर्माणाधीन पुलको काम प्रभावित भएको हो।

सडक आयोजना कार्यालयले तीन वर्षअघि २०७८ माघमा छ वटा र ०७९ जेठमा दुई गरी आठ पुल निर्माणका लागि २८ करोड ७५ लाखमा ठेक्का लगाएको थियो। पर्याप्त बजेट विनियोजन नहुँदा पुल निर्माणको कामले गति लिन नसकेको इञ्जिनियर रैखोलाले जानकारी दिए।

आयोजना कार्यालयले दिएको जानकारीअनुसार चप्टे नदीमा पुल निर्माण गर्न २ करोड ९७ लाख, मटेलीमा ३ करोड २६ लाख र चौकीगडा पुलका लागि ४ करोड ७० लाखमा तथा सलेनामा सालाकोट पुल निर्माण गर्न ३ करोड ५१ लाखमा निर्माण कम्पनीसँग सम्झौता भएको थियो।

आठवटै पुलका निर्माणका लागि गत आर्थिक वर्ष २०८०/८१ मा ४०/४० लाखका दरले बजेट विनियोजन गरिएको थियो। चालु आर्थिक वर्ष २०८१/८२ मा ८०/८० लाखका दरले प्रतिपुल निर्माण गर्न बजेट विनियोजन गरिएको उनको भनाइ थियो।

धनगढीदेखि बझाङको थलारासम्मको १८६ किलोमिटर सडकमा २३ किलोमिटर सडक कालोपत्र भएको छ। ३६ किलोमिटर सडक कालोपत्र गर्न तीन खण्डमा ठेक्का लगाइएको सडक आयोजना कार्यालयले जनाएको छ।

प्रकाशित मिति: मंगलबार, पुस ९, २०८१ १७:५१

प्रतिक्रिया दिनुहोस्