२७ वर्षपछि प्रहरी चौकीको पुनर्निर्माण, एक करोड ४० लाख लागत

समाज

गृहपृष्ठ
समाज

२७ वर्षपछि प्रहरी चौकीको पुनर्निर्माण, एक करोड ४० लाख लागत

क्यापिटल नेपालबिहीबार, पुस ४, २०८१

नुवाकोट । सशस्त्र द्वन्द्वको समयमा ध्वस्त भएको प्रहरी चौकी देउरालीको नयाँ भवनको पुनर्निर्माण सम्पन्न भएको छ। विं.सं. २०५४ मा तत्कालीन समयमा नेकपा (माओवादी)को आगजनीबाट ध्वस्त बनेको प्रहरी चौकी २७ वर्षपछि पुनर्निर्माण गरिएको हो।

पुनर्निर्माण भएको भवन बागमती प्रदेशका मुख्यमन्त्री बहादुरसिंह लामा (तामाङ)ले उद्घाटन गरे। प्रहरी चौकीको नयाँ भवन निर्माणसँगै जनताको शान्ति सुरक्षा तथा न्यायसहित राज्यको उपस्थिति घरदैलोसम्म पुग्ने उनको भनाइ थियो।

प्रहरी चौकीसहित तत्कालीन समयमा ध्वस्त बनाइएको गाविसको भवन अहिले पालिकाका रुपमा स्थापना भएको छ। नेपाल विद्युत् प्राधिकरण र कृषि विकास सेवा केन्द्र काम अझै अवरुद्ध हुँदा सेवाग्राहीलाई समस्या भइरहेको म्यागङका अध्यक्ष आशा तामाङ बताइन्।

उक्त भवन निर्माणका लागि स्थानीय सर्वजित तामाङ र रामबहादुर तामाङले आवश्यक जग्गा निःशुल्क उपलब्ध गराएका थिए। कार्यक्रममा मुख्यमन्त्री तामाङबाट जग्गादाताद्वयलाई दोसल्ला ओढाएर प्रशंसा पत्र प्रदान गरिएको थियो।

उक्त भवन एक करोड ४० लाख खर्चमा निर्माण भएको हो। प्रहरी चौकीमा इलाका प्रहरी कार्यालयको स्तरोन्नतीको लक्ष्यसहित आवश्यक भौतिक संरचनाको पुनर्निर्माण गरिएको छ।

प्रकाशित मिति: बिहीबार, पुस ४, २०८१ १६:४४

प्रतिक्रिया दिनुहोस्