काठमाडौँ। अमेरिकन चेम्बर अफ कमर्स (एमच्याम)ले नेपाल सरकारलाई एक ज्ञापन पत्र बुझाउँदै लगानीको वातावरण सुधार्न विभिन्न रणनीतिक सुझाव दिएको छ। ज्ञापनपत्रमा विभिन्न व्यावसायिक क्षेत्रको विकाससँगै नेपाल र अमेरिकाबीचको आर्थिक सम्बन्धलाई मजबुत बनाउन अनुकूल वातावरण निर्माण हुनपर्नेमा जोड दिइएको छ।
नेपालका कृषि तथा परामर्श सेवाका क्षेत्रमा अमेरिकी लगानीको विस्तारको पहल गर्न सुझाव दिइएको छ। त्यस्तै, एमच्यामले २ लाख अमेरिकी डलरभन्दा माथिको लगानीको लागि व्यापार दर्ता प्रक्रियामा सजिलो बनाइनुपर्ने जनाएको छ।
एमच्यामले उद्योग विभागबाट दर्ता प्रक्रिया सरल र छिटो बनाउन पहल हुनुपर्ने माग गरेको छ। यसले विदेशी व्यावसायीहरू नेपालमा पूँजी ल्याउन र लगानी गर्न उत्साहित हुने जनाइएको छ। त्यस्तै, कमाइ रकम स्वेदश फिर्ताको प्रक्रिया पनि सहजर र सुविधाजनक बनाउनुपर्ने एमच्यामको माग छ।
द्रुत गतिमा बढिरहेको सूचना प्रविधि क्षेत्रमा अमेरिकी प्रविधि कम्पनीहरूको ठूलो लगानीको सम्भावनाबारे पनि एमच्याम चासो व्यक्त गरेको छ। यसले नेपाल सरकारलाई अनुकूल र लचिलो नियम बनाउन ध्यानकर्षण गरिएको छ। त्यसो भएको खण्डमा नेपाल अन्तर्राष्ट्रिय प्रविधि कम्पनीहरूको आकर्षक गन्तव्य बन्ने एमच्यामको भनाइ छ।
करका दरहरू स्थिर हुनुपर्ने विषय पनि एमच्यामले उठाएको अर्को महत्त्वपूर्ण मुद्दा हो। लगानीकर्ताहरूका लागि स्थिर र पूर्वानुमान गर्न सकिने कर वातावरण बनाउनुपर्ने पनि ज्ञापनपत्रमा उल्लेख छ। यसले दीर्घकालीन लगानीको वातावरण तयार गर्ने र अमेरिकी लगानीकर्तालाई नेपालमा विश्वास बढ्ने जनाइएको छ।
एमच्यामले प्रतिस्पर्धा र उपभोक्ता संरक्षणको सुनिश्चितता गर्दै लगानीलाई प्रवर्द्धन गर्नका लागि नेपाल सरकारसँग सवारी साझेदारी उद्योगका लागि स्पष्ट नियमहरू बनाउन आग्रह गरेको छ। डबल कर प्रणालीको मुद्दामा, एमच्यामले नेपाल सरकारसँग अमेरिकासँग मिलेर दोहोरो कर हटाउने सम्झौता लागू गर्न पहलका लागि पनि आग्रह गरेको छ।
अमेरिकी लगानीकर्ताका लागि भिसा प्रक्रिया सरल बनाउन पनि एमच्यामले सुझाव दिएको छ। यसले नेपालमा व्यवसाय स्थापना वा विस्तार गर्ने प्रक्रियालाई सजिलो बनाउने दाबी गरिएको छ।
