काठमाडौं। मोबाइल सेवाप्रदायक कम्पनी एनसेल सबै भन्दा बढी कर तिरेकोमा सम्मानित भएको छ। गत आर्थिक वर्षमा संस्थागततर्फ सबैभन्दा बढी कर योगदान गरेकोमा ललितपुर महानगरले एनसेलललाई उत्कृष्ट करदाताका रुपमा सम्मान गरेको हो।
प्रधानमन्त्री केपी शर्मा ओली र ललितपुर महानगरका मेयर चिरीबाबु महर्जनले संयुक्त रुपमा महानगरको १०६औं स्थापना दिवस अवसरमा आयोजित कार्यक्रमा एनसेलका प्रमुख कार्यकारी अधिकृत तथा प्रबन्ध निर्देशक जाब्बोर कायुमोभलाई उक्त सम्मानपत्र वितरण गरेका थिए।
सबैभन्दा बढी कर तिरेर महानगरको विकास र समृद्धिमा योगदान पुर्याएकाले उच्च कदर गर्दै एनसेललाई सम्मान गरिएको ललितपुर महानगरले जनाएको छ। विगत लामो समयदेखि एनसेल सबैभन्दा बढी कर तिर्ने कम्पनीको रुपमा स्थापित रहँदै आएको छ ।
‘ललितपुर महानगरपालिकाले हाम्रो योगदानलाई कदर गर्दै प्रदान गर्नुभएको सम्मानका लागि कृतज्ञ छौं। ठूलो करदाताका रुपमा हामीले प्रत्येक वर्ष सरकारलाई विभिन्न कर तथा शुल्क शीर्षकअन्तर्गत राजस्वमा ठूलै योगदान गर्छौं र यसरी देशको अर्थतन्त्र र विकासमा प्रत्यक्ष, अप्रत्क्षरुपमा योगदान गर्न पाउँदा हामी गौरवान्वित छौं’, एनसेलका प्रमुख कार्यकारी अधिकृत तथा प्रबन्ध निर्देशक जाब्बोर कायुमोभले भने।
यसअघि पनि एनसेलले विभिन्न समयमा सरकारबाट सर्वोत्कृष्ट करदाता, सर्वोत्कृष्ट आयकरदातालगायतको विभिन्न सम्मान पाइसकेको छ।
एनसेलले स्थापनाकालदेखि गत आव २०८०/८१ सम्ममा सरकारलाई विभिन्न कर तथा शुल्क शीर्षकमा ३०० अर्बभन्दा बढी तिरिरहेको छ। गत आवमा मात्रै कम्पनीले २०.३० अर्ब कर तथा शुल्क सरकारलाई दाखिला गरेको छ।
यसैगरी कम्पनीले व्यावसायिक सामाजिक जिम्मेवारी अन्तर्गत २ अर्बभन्दा बढीको योगदान गरी सातै प्रदेशका समुदायस्तर सम्म पुगेर देशभरका १ करोड ३० लाख भन्दा बढी जनसंख्यालाई प्रत्यक्ष÷अप्रत्यक्ष रुपमा लाभ दिएको छ।
