काठमाडौँ। चितवनको इच्छाकामना गाउँपालिकाको माथिल्लो भेगका सुन्तला बगान अहिले पहेँलपुर छन्। सुन्तला खरिद गर्न व्यापारी बगानमै आइपुगेका छन्।
सुन्तला खेती गर्दै आएका इच्छाकामना गाउँपालिका ५ तामिनका किसान रामप्रसाद बोहोराका अनुसार बोटमै व्यापारीले प्रतिकिलो एक सयका दरले सुन्तला खरिद गरिरहेका छन् । उनले भने, “सुन्तला बिक्रीका लागि बजारको समस्या छैन, बोटमै बिक्री भइरहेको छ।”
सोही गाउँका अर्का किसान हरिबहादुर नेपालले पनि सुन्तला बिक्रीका लागि बजारको समस्या नरहेको बताए। बगानमै आएर व्यापारीले सुन्तला खरिद गरिरहेको उनको भनाइ थियो। सुन्तलाले मूल्य पाए पनि पछिल्लो केही वर्षयता बोट मर्ने क्रम बढेकाले उत्पादनमा कमी आएको उनले बताए।
इच्छाकामना गाउँपालिका कृषि शाखाका प्राविधिक आशिष त्रिपाठीले यहाँका सुन्तला स्वादिष्ट हुने हुँदा बजारको समस्या नरहेको बताए। उत्पादित सुन्तला मुग्लिन, कुरिनटार, फिस्लिङका बजारमा बिक्रीका लागि लगिन्छ। फिस्लिङको तरकारी तथा फलफूल बिक्री केन्द्रबाट होलसेल मूल्यमा नारायणगढ, काठमाडौँ, पोखरालगायत विभिन्न सहरमा सुन्तला लैजाने गरिन्छ।
गाउँपालिकाको कृषि शाखाका अनुसार इच्छाकामना गाउँपालिकाको ८० हेक्टर क्षेत्रफलमा सुन्तला खेती हुँदै आएको छ। आगामी आर्थिक वर्षमा १५ देखि २० हेक्टर क्षेत्रफलमा सुन्तला खेती विस्तार गर्ने गाउँपालिकाको योजना छ। किसानलाई गाउँपालिकाले अनुदानमा बेर्ना उपलब्ध गराउने योजना रहेको कृषि प्राविधिक त्रिपाठीले जानकारी दिए।
गत वर्ष इच्छाकामनाका किसानले सुन्तलाबाट आठ करोड भित्र्याएका थिए। चालु आर्थिक वर्षमा पनि सोही हाराहारीमा आम्दानी हुने अनुमान गरिएको छ।
गाउँपालिका अध्यक्ष दानबहादुर गुरुङका अनुसार गाउँपालिकाले माटो परीक्षण तथा चुना वितरण, सुन्तलाको बेर्ना तथा कृषि सामग्री अनुदानमा वितरण, किसानस्तरीय बगैँचा व्यवस्थापन तालिम, सिँचाइका लागि सहयोग, प्राविधिक सेवाहरू उलब्ध गराउँदै आएको छ।
अध्यक्ष गुरुङले भने, “यहाँका सुन्तला राजमार्गका पसल र विभिन्न सहरमा पुग्ने गरेको भए पनि इच्छाकामनाको हो भन्ने थाहा थिएन, अहिले इच्छाकामनाको सुन्तला खोजी हुन थालेको छ।”
किसानको उत्पादनलाई बजारीकरणमा सहयोग पुर्याउन गाउँपालिकाले तरकारी संकलन केन्द्र र भण्डारणका लागि चिस्यान केन्द्रसमेत निर्माण गरिएको छ।
-1734435091.jpg)
