काठमाडौँ। हुलाक सेवा विभागले दुई नयाँ टिकट प्रचलनमा ल्याएको छ। हुलाक सेवा विभागले ‘एक सय ५० औँ विश्व हुलाक दिवस’, र ‘इन्टरपोल एक सयौँ वार्षिकोत्सव’ शीर्षकका दुई टिकटमा सञ्चार तथा सूचना प्रविधिमन्त्री पृथ्वी सुब्बा गुरुङ र मन्त्रालयका सचिव राधिका अर्यालद्वारा टाँचा प्रदान गरिएको छ।
सन् २०२४ का हुलाक टिकटहरूको प्रथम दिवसीय आवरणमा टाँचा प्रदान गरिएको हो। हुलाक विभागअन्तर्गत हालसम्म एक हजार ४५२ प्रकारका हुलाक टिकट छापिसकेको छ। आज टाँचा प्रदान गरिएका हुलाक टिकट १० दरका १०-१० लाख प्रकाशनमा ल्याइएका विभागले जनाएको छ।
विश्वस्तरमा हुलाक सेवा र संरचनाको नेतृत्व गर्ने विश्व हुलाक संघ (युपियू)को स्थापना सन् १८७४ अक्टोबर ९ मा भएको हो। यसमा नेपालसहित १९२ सदस्य राष्ट्र छन्। संघको स्थापनाका अवसरमा प्रत्येक वर्ष अक्टोबर ९ मा विश्व हुलाक दिवस मनाउने गरिन्छ।
यस्तै, सन् १९२३ सेप्टेम्बर ७ मा इन्टरनेसनल क्रिमिनल पोलिस अर्गनाइजेसन (इन्टरपोल)को स्थापना भएको हो। अन्तर्राष्ट्रिय संगठित अपराध, साइबर अपराध, आतंकवाद, लागुऔषध, मानव बेचबिखनलगायत सीमापार हुने बहुआयामिक तथा संगठित अपराध नियन्त्रण तथा रोकथामका लागि विश्वव्यपी रूपमा प्रहरी संगठनहरूलाई एकबद्ध गर्ने उद्देश्यले स्थापना भएको जनाइएको छ ।
टिकट टाँचा प्रदानपछि मन्त्रालयका सचिव अर्यालले हुलाक विभागको ऐतिहासिक र सांस्कृतिक महत्व रहेको बताए। दुई वर्षअघि विदेशबाट हुलाक टिकट छाप्नु पर्ने अवस्था सम्झाउँदै उनले सुरक्षण मुद्रण केन्द्रलाई व्यवस्थित गरेर राष्ट्रिय सुरक्षाका अरू कागजातहरू पनि स्वदेशमै छाप्ने तयारी मन्त्रलायले गरिरहेको जानकारी दिए।
हुलाक विभागका महानिर्देशक मनमाया पँगेनी भट्टराईले हुलाकका समस्या र चुनौती अध्ययन गर्दै आधुनिक हुलाक बनाउन भूमिका खेल्ने प्रतिबद्धता व्यक्त गरिन्।
-1744437772.jpg)
