काठमाडौं। १४० वर्षे पारिवारिक व्यावसायिक घराना ज्योति ग्रुप विधिवत् रुपमा टुक्रिएको छ। दाजुभाइबीच लामो समयदेखि अंश विवाद बढेसँगै औपचारिक रुपमा ज्योति ग्रुप टुक्रिएको हो।
ज्योति ग्रुपबाट टुक्रिएको घोषणा गर्दै पद्म ज्योतिले आफ्नै नाममा ‘पद्म ज्योति ग्रुप’ स्थापनाको घोषणा गरेका छन्। ‘ज्योति समूहलाई पद्म ज्योति समूहमा रुपान्तरण गरी विकास र सृजनशीलताको नयाँ यात्राको सुरुआत भएको घोषणा गर्न पाउँदा हामी खुसी छौं,’ अध्यक्ष पद्म ज्योतिले भने, ‘धेरै बाधा र चुनौती पार गरे पनि यो समूह आफ्नो उत्कृष्टताको विरासतमा प्रतिबद्ध रहँदै निरन्तर अघि बढ्नेछ।’
पद्म ज्योति ग्रुपले गुणस्तरका लागि परिचित आफ्ना विश्वसनीय ब्रान्डसँगै भविष्यलाई आकार दिन नयाँ योजना र रणनीति ल्याइरहेको उनले बताए। ज्योति समूहबाट पद्म ज्योति समूहमा परिवर्तनले प्रगति, अनुकूलता र नयाँ अवसरको खोजी गरेको उनले दाबी गरे।
नयाँ ग्रुपको अध्यक्षमा पद्म आफैं छन् भने संस्थापक सदस्यमा मीरा ज्योति र सौरभ ज्योति, सिर्जना ज्योति र आरती ज्योति कम्पनीका निर्देशक छन्।
ज्योति समूह एक शताब्दीअघिदेखि नै तिब्बत व्यवसायमा संलग्न थियो। यसको स्थापना १९४० को दशकमा मणिहर्ष ज्योतिले गरेका हुन्। ज्योति समूहमा पद्य ज्योति अध्यक्ष छन् भने रुप ज्योति उपाध्यक्ष थिए। ज्योति समूहको सुरुआत उनीहरूका हजुरबुबाले सुरु गरेका थिए, जसलाई पिता मणिहर्ष ज्योतिले आधुनिकीकरण गरेका थिए।
मणिहर्षले स्थापना गरेको व्यापारिक घराना ज्योति समूह लोभलाग्दो व्यापारिक घरानाका रूपमा स्थापित थियाे। तर, दाजुभाइबीचको अंशबन्डा विवादले यति पुरानो व्यावसायिक घराना टुक्रिएको हो।
ग्रुपसँग हाल हिमाल स्टिल, भाजुरत्न इन्जिनियरिङ एन्ड सेल्स, हिमाल वायर्स, ज्योति स्पिनिङ मिल्स, भाजुरन्त फार्मास्युटिकल्स र होन्डा मोटरसाइकल छन्।
