दक्षिण एसियाले व्यापार नीति पुनर्विचार गर्नुपर्छः महासंघ अध्यक्ष ढकाल

उद्योग

गृहपृष्ठ
उद्योग

दक्षिण एसियाले व्यापार नीति पुनर्विचार गर्नुपर्छः महासंघ अध्यक्ष ढकाल

क्यापिटल नेपालशुक्रबार, मंसिर २८, २०८१

काठमाडौं। नेपाल उद्योग वाणिज्य महासंघ अध्यक्ष चन्द्रप्रसाद ढकालले दक्षिण एसियाले आफ्नो व्यापार नीति पुनर्विचार गर्न आवश्यक रहेको बताएका छन्। यसले कमजोर क्षेरूको संरक्षण गर्दै हरित र समावेशी विकासलाई प्रोत्साहन गर्नुपर्नेमा ढकालको जोड छ।

शुक्रबार सम्पन्न १५औं दक्षिण एसियाली आर्थिक शिखर सम्मेलन समापन अवसरमा ढकालले दक्षिण एसिया संसारकै तीव्र आर्थिक वृद्धिका क्षेत्रमध्ये एक भए पनि व्यापार र लगानी प्रवाहका हिसाबले सबैभन्दा कम जोडिएको क्षेत्र रहेको बताए।

उनले क्षेत्रीय आर्थिक एकीकरणका लागि पछिल्लो दशकमा ठोस प्रगति नभएको जानकारी गराउँदै यस क्षेत्रमा घरेलु उद्योगमा दक्षिण एसियाली स्वतन्त्र व्यापार क्षेत्रअन्तर्गतको न्यून भन्सार महसुलले महत्त्वपूर्ण दबाब सिर्जना गरेको औंल्याए।

विशेषगरी नेपाल जस्ता साना अर्थतन्त्रको स्थानीय उद्योगको संरक्षण र प्रवर्द्धन गर्न गाह्रो परेको र छिमेकी देशका स्थापित क्षेत्रसँग प्रतिस्पर्धा गर्नुपरेको ढकालले बताए।

ढकालले साफ्टाले दक्षिण एशियाली क्षेत्रभित्र व्यापार र लगानी प्रवर्द्धन गर्न सहयोग गर्नुपर्नेमा जोड दिए। उनले नेपालको जलविद्युतजस्ता नवीकरणीय ऊर्जा क्षेत्रमा रहेको विशाल सम्भावनालाई उजागर गर्दै साझा ऊर्जा ग्रिडले सबै देशलाई स्वच्छ ऊर्जा स्रोतमा पहुँच प्रदान गर्न र जीवाश्म ईन्धनमा निर्भरता कम गर्न सहयोग गर्न सक्ने धारणा व्यक्त गरे।

अध्यक्ष ढकालले दक्षिण एसियाली क्षेत्रले जलवायु परिवर्तनको असर भोग्नुपरे पनि अनुकूलन र न्यूनिकरणका लागि स्रोत सीमित रहेको बताए। जलवायु योजना कार्यान्वयनका लागि २०३० सम्म वार्षिक २०० अर्ब अमेरिकी डलर आवश्यक पर्ने अनुमान रहेको उनले जानकारी गराए।

प्रकाशित मिति: शुक्रबार, मंसिर २८, २०८१ १७:३५

प्रतिक्रिया दिनुहोस्