काठमाडौं। सत्तासाझेदार नेपाली कांग्रेस र नेकपा एमालेबीच बीआरआई सम्झौतामा खटपट भएको विषय बाहिरिएसँगै त्यसको असर सेयर बजारमा परेको छ। खासगरी, दुई दलबीच बिआरआईका विषयमा अलगअलग मत रहेको र त्यसले सरकारसम्म ढल्नसक्ने चर्चा चलेसँगै सेयर बजार शिथिल बनेको हो।
बजारमा यहि विषयलाई लिएर सरकार ढल्ने व्यापक चर्चा भएपछि सेयर बजार सूचक नेपाल स्टक एक्सचेञ्ज (नेप्से) लगातार घटिरहेको छ भने कारोबार पनि संकुचित हुँदै गएको छ। साताको कारोबारको दोस्रो दिन सोमबार मात्रै नेप्से १२.८४ अंकले घटेर २६७६.१५ बिन्दुमा रोकिएको छ।
अघिल्लो कारोबार दिन आइतबार नेप्से ४५.९३ अंकले घटेर २६८९.०० बिन्दुमा रोकिएको थियो। गत साताको बिहीबार नेप्से १५.९३ अंकले घटेको थियो भने बुधबार पनि २४.९७ अंकको संकुचन आएको थियो।
सोमबार कारोबार रकम पनि साढे ५ अर्बमा सीमित भएको छ। आज नेप्सेमा कुल ५ अर्ब ५६ करोड रुपैयाँ बराबरको कारोबार भएको छ।
अघिल्लो कारोबार दिन आइतबार नेप्सेमा कुल ७ अर्ब ३५ करोड रुपैयाँ बराबरको कारोबार भएको थियो भने गत साताको बिहीबार ८ अर्ब २७ करोड रुपैयाँ बराबरको कारोबार भएको थियो। यस्तै, बुधबार भने ९ अर्ब ६ करोड रुपैयाँ बराबरको कारोबार भएको थियो।
सोमबार कारोबारमा आएकामध्ये ९२ कम्पनीको सेयर मूल्य बढ्दा १३८ कम्पनीको घटेको छ। यस्तै, १३ कम्पनीको सेयर मूल्य भने स्थिर छ।
सोमबार इमर्जिङ नेपाल लिमिटेडको सेयर मूल्य ८.७६ प्रतिशतले बढ्दा महिला लघुवित्त वित्तीय संस्थाको सेयर मूल्य ७.१४ प्रतिशतले बढेको छ।
स्वाभिमान लघुवित्त वित्तीय संस्थाको सेयर मूल्यमा नकरात्मक सर्किट लाग्दा खानीखोला हाइड्रोपावरको सेयर मूल्इ ८.२१ प्रतिशतले घटेको छ।
खासगरी नेपाली सेयर बजारमा केही राजनीतिक समिकरण परिवर्तनको विषयमा चर्चा चल्नसाथ त्यसको असर चल्ने गरेको छ। सोमबार मात्रै नेपाली कांग्रेसले चीनसँग भएको बीआरआई सम्झौता अनुदानमा आधारित सहयोगको समझादारी भएको बताएको छ।
सोमबार बसेको कार्यसम्पादन समितिको बैठकमा प्रधानमन्त्री चीन जाँदा भएको दुई पक्षीय समझदारी बारेमा छलफल भएको र पार्टीले अनुदान स्वीकार गर्ने तर, ऋण स्वीकार नगर्ने विषयमा स्पष्ट रहेको जनाएको थियो। यस विषयमा एमाले कांग्रेसमा एक किसिमको मतभेद आउने देखिरहेको छ जसको असर सेयर बजारमा पनि देखिएको हो।
