अर्थमन्त्री पौडेल–अमेरिकी सहायक विदेशमन्त्री लु भेट, एमसिसी परियोजनाबारे छलफल

अर्थतन्त्र

गृहपृष्ठ
अर्थतन्त्र

अर्थमन्त्री पौडेल–अमेरिकी सहायक विदेशमन्त्री लु भेट, एमसिसी परियोजनाबारे छलफल

क्यापिटल नेपालसोमबार, मंसिर २४, २०८१

काठमाडौं। उपप्रधान एवं अर्थमन्त्री विष्णुप्रसाद पौडेल र अमेरिकी सहायक विदेशमन्त्री डोनाल्ड लुबीच भेटवार्ता भएको छ।

भेटमा द्विपक्षीय आर्थिक सहयोग, मिलेनियम च्यालेन्ज कर्पोरेसन (एमसिसी) र अमेरिकी अन्तर्राष्ट्रिय विकास नियोग (युएसएआइडी) अन्तर्गतका परियोजनाको प्रभावकारी कार्यान्वयन, विकास वित्त तथा निजी क्षेत्रमा लगानी परिचालनलगायतका विषयमा छलफल भएको मन्त्रालयले जानकारी दिएको हो।

‘नेपाल र अमेरिकाबीचको सहयोग आदानप्रदानको विषयमा छलफल भयो। अमेरिकी सहयोगमा एमसिसी, युएसएआइडीलगायतका कार्यक्रमबाट सञ्चालित परियोजना कार्यान्वयनका सम्बन्धमा पनि छलफल भयो’, अर्थ मन्त्रालयका सहसचिव धनीराम शर्माले भने, ‘अमेरिकी अन्तर्राष्ट्रिय विकास वित्त निगम डिएफसी) बाट नेपालको निजी क्षेत्रमा पनि लगानी भइरहेकामा त्यसलाई अझ कसरी प्रभावकारी बनाउन र विस्तार गर्न सकिन्छ तथा नेपालमा थप पुँजी कसरी भित्र्याउन सकिन्छ भन्नेबारे उहालेँ चासो देखाउनुभएको छ। यसमा हामीले निजी क्षेत्रबाट लगानीलाई प्रोत्साहन गर्न सरकारको तर्फबाट सहयोग हुने प्रतिबद्धता जनाएका छौंं।’

अर्थमन्त्री पौडेलले नेपालमा राजनीतिक स्थायित्व भएकाले अबको मुख्य प्राथमिकता आर्थिक समृद्धि भएको र त्यसका लागि नेपालमा अमेरिकी सहयोगलाई थप विस्तार गर्न मन्त्री लुलाई आग्रह गरे।

अमेरिकी सहायक विदेशमन्त्री लुले दक्षिण एसियाका केही देश आर्थिक रुपमा समस्यामा परे पनि नेपाल आर्थिक वृद्धि र स्थायित्व कायम गर्न सफल भएको भन्दै खुशी व्यक्त गरे। उनले अमेरिका आगामी दिनमा नेपालमा थप आर्थिक सहयोग गर्ने पक्षमा रहेको जानकारी दिए।

प्रकाशित मिति: सोमबार, मंसिर २४, २०८१ १२:२०

प्रतिक्रिया दिनुहोस्