काठमाडौं। गत साता पनि सेयर बजार सूचक नेपाल स्टक एक्सचेञ्ज (नेप्से) २७०० बिन्दुमै कायम भयो। २०८१ असार १६ गते २०३७.०९ बिन्दुमा रहेको नेप्से लगातार बढेर साउन ३१ गते ३०००.८१ बिन्दुसम्म पुगेर फेरि निरन्तर घट्दै असोज १३ गते २४६४.४० (त्यस दिन २४४२.५७ न्यून बिन्दु)सम्म खुम्चियो।
यसपछि उकालो लागेको बजारले अधिकांश समय २७०० बिन्दुमा रहेर बिताएको छ जसको निरन्तरता गत साता पनि मिलेको हो।
मंसिर १३ गते बिहीबार २७४८.०५ बिन्दुमा रहेको नेप्से गत साताको पाँच करोबार दिनमा दुई दिन बढेर तीन दिन घट्दा १३ अंकको गिरावटका साथ बिहीबार २७३४.९३ बिन्दुमा रोकिएको छ।
अघिल्लो साताको पाँच कारोबार दिनमा भने नेप्से दुई दिन घटेर तीन बढ्दा साताभरमा ६८ अंकले बढेको थियो। गत साता नेप्सेमा कुल ४४ अर्ब ८९ करोड रुपैयाँ बराबरको कारोबार भएको छ। अघिल्लो साता भने कुल ३८ अर्ब ८७ करोड रुपयाँ बराबरको कारोबार भएको थियो।
खासगरी, पछिल्लो समय सेयर बजारमा फाइनान्स, लघुवित्त, जलविद्युत्, विकास बैंक र व्यापार जस्ता साना समूह (क्षेत्र) मात्रै बढी चलिरहेका छन्। घट्दा होस् वा बढ्दा यी नै साना समूहका कम्पनी नै बढी चलयमान हुँदै आएका छन्।
विकास बैंक र बिमा समूह जस्ता समूह भने खासै चल्न सकेका छैनन्। यसरी, साना समूह मात्रै चल्ने र ठूला समूह नचल्ने गरेका कारण नै नेप्से सूचक पछिल्लो केही सातादेखि एउटै बिन्दुमा रुमल्लिरहेको हो। कारोबार रकममा पनि ठूलो अन्तर देखिएको छैन।
मंसिर तेस्रो साता (गत साता) अर्थात् मंसिर १६ गतेदेखि २० गतेसम्मको पाँच कारोबार दिनमा नेप्से १३ अंकले घटेर २७३४.९३ बिन्दुमा रोकियो। गत साता नेप्सेमा कुल ४४ अर्ब ८९ करोड रुपैयाँ बराबरको कारोबार हुँदा साना समूह बढी मात्रामा चले। गत साता जलविद्युत समूहमा १ प्रतिशत, जीवन बिमा समूहमा १.३७ प्रतिशत र व्यापार समूहमा १९.९८ प्रतिशतको सुधार आयो।
यसबाहेकका अन्य समूह भने बढ्न सकेनन्। बैंकिङ समूहमा ३.४८ प्रतिशत, विकास बैंक समूहमा ०.७५ प्रतिशत, फाइनान्स समूहमा ७.४२ प्रतिशत, लघुवित्त समूहमा २.११ प्रतिशत, निर्जीवन बिमा समूहमा ०.८५ प्रतिशत, होटल तथा पर्यटन समूहमा ०.६३ प्रतिशत, उत्पादन समूहमा १.३४ प्रतिशत, लगानीमा समूह १.१६ प्रतिशत र अन्य समूहमा २.६७ प्रतिशतको गिरावट आयो।
मंसिर दोस्रो साता अर्थात् मंसिर ९ गतेदेखि १३ गतेसम्मको पाँच कारोबार दिनमा नेप्से ६८ अंकले बढ्दै २७४८ बिन्दुमा पुग्यो। यो साताभर नेप्सेमा कुल ३८ अर्ब ९३ करोड रुपैयाँ बराबरको कारोबार भयो। यो साता बैंकिङ समूह ०.२० प्रतिशत, विकास बैंक समूह ४.३२ प्रतिशत, फाइनान्स समूह १.९३ प्रतिशत, जलविद्युत् समूह २.०८ प्रतिशत र लघुवित्त समूह ०.४२ प्रतिशतले बढ्यो।
उक्त साता जीवन बिमा समूह ४ प्रतिशत, निर्जीवन बिमा समूह २.५७ प्रतिशत, होटल तथा पर्यटन समूह २.०२ प्रतिशत, उत्पादन समूह १.२९ प्रतिशत, लगानी समूह २.२० प्रतिशत, व्यापार समूह २०.९६ प्रतिशत र अन्य समूह १.७८ प्रतिशतले बढयो। व्यापार समूह, विसका बैंक समूह र जीवन बिमा समूह यस साता सर्वाधिक आकर्षणमा परे।
मंसिर पहिलो साता अर्थात् २ गतेदेखि ६ गतेसम्मको चार कारोबार दिनमा नेप्से ६८ अंकले घटेर २६८०.४४ बिन्दुमा सीमित भयो। यस साता नेप्सेमा ३६ अर्ब ९३ करोड रुपैयाँ बराबरको कारोबार भएको थियो। यो साता बैंकिङ समूह २.४० प्रतिशत, फाइनान्स समूह ५.१० प्रतिशत, जलविद्युत् समूह १.९० प्रतिशत र लघुवित्त समूह ०.८४ प्रतिशतले घट्यो।
उक्त साता जीवन बिमा समूह ३.२५ प्रतिशत, निर्जीवन बिमा समूह ३.७१ प्रतिशत, होटल तथा पर्यटन समूह २.३५ प्रतिशत, उत्पादन समूह ४.०५ प्रतिशत, लगानी समूह २.४७ प्रतिशत, व्यापार समूह २.६७ प्रतिशत र अन्य समूह ३.२० प्रतिशतले घट्यो। सबै समूहमा गिरावट आए पनि विकास बैंक समूहमा भने यो साता ०.१४ प्रतिशतको सुधार आयो।
यस्तै, कात्तिक अन्तिम साता अर्थात् कात्तिक २५ गतेदेखि २९ गतेसम्मको पाँच कारोबार दिनमा नेप्से ७३ अंकले बढेर २७४८ बिन्दुमा रोकियो।
यो साताभर नेप्सेमा कुल ४६ अर्ब ६ करोडको कारोबार भएको थियो। यो साता बैंकिङ समूह १.३२ प्रतिशत, विकास बैंक समूह ४.९९ प्रतिशत, फाइनान्स समूह ७.५४ प्रतिशत, जलविद्युत् समूह ५.८६ प्रतिशत र लघुवित्त समूह ४.४९ प्रतिशतले बढ्यो।
उक्त साता जीवन बिमा समूह २.१ प्रतिशत, निर्जीवन बिमा समूह ०.५१ प्रतिशत, होटल तथा पर्यटन समूह १.६८ प्रतिशत, उत्पादन समूह १ प्रतिशत, लगानी समूह २.३२ प्रतिशत र अन्य समूह १.७८ प्रतिशतले बढयो। कात्तिक अन्तिम साता सबै समूहको सूचक उकालो लागे पनि व्यापार समूह भने ०.०२ प्रतिशतको गिरावट आएको छ। यो साता फाइनान्स समूह र जलविद्युत् समूह सर्वाधिक चले।
माथि उल्लेखित पछिल्लो चार हप्ताको समूहगत उतारचढाव हेर्ने हो भने चाहे बढ्दा होस् या घट्दा होस् फाइनान्स, जलविद्युत, विकास बैंक, व्यापार समूह र लघुवित्त समूह नै बढी मात्रामा उतारचढाव भएको देखिन्छ। यी समूह नै एकपछि अर्को गर्दै पालैपाले घटबढ भइरहेका छन्। सकरात्मक सर्किट लगाउने होस् या नकरात्मक सर्किट लाग्ने यसमा पनि यी नै समूहका कम्पनी बढी मात्रामा छन्। सर्वाधिक सेयर खरिदबिक्री हुने कम्पनीमा पनि यी समूहकै कम्पनी बढी छन्।
सेयर बजारमा बैंक समूह सबैभन्दा ठूलो क्षेत्र हो। यो समूह बढेमा नेप्से सूचक पनि बढ्ने सम्भावना उच्च हुन्छ भने यो समूह घटेमा सूचक घट्ने सम्भावना उच्च हुन्छ।
यसैले पनि विकास बैंक र बजारका ठूला समूहलाई सूचक निर्धारण गर्ने कारकको रुपमा पनि लिइन्छ। यी समूहको सूचक जता जान्छ समग्र बजारको सूचक त्यतै जाने भएकाले पनि यसो भनिएको हो। तर, बैंक, बिमा जस्ता ठूला समूह स्थिर जस्तै छन्।
ठूला क्षेत्रका कम्पनीको कारोबार र सेयर मूल्यमा पनि धेरै घटबढ आएको छैन। ठुला कम्पनी चलयमान नभई अन्य साना समूह मात्रै चलेर त्यसले सूचक र कारोबारमा ठूलो अन्तर ल्याउन कठिन हुन्छ।
पछिल्लो समय पनि ठूला समूह नचल्ने र साना समूह र कम्पनी मात्रै चम्किने गरेका कारण सूचक २७०० बिन्दु वरीपरी नै रहिरहेको छ। बजार बढ्ने र घट्ने भनेर धेरैले गरेको अनुमान नै लगातार विफल हुँदै आएको छ।
लगभग, दसैं तिहार यतादेखि नै बजार अहिलेको अवस्थामा छ। ठूला चाडपर्व सकिएसँगै नेप्सेले तिब्र गति समात्ने आँकलन गरिएपनि त्यसो हुन सकेन। यसपछि, नेपाल राष्ट्र बैंकले चालू आर्थिक वर्षको मौद्रिक नीति समीक्षा नीतिगत प्रावधान यथावत् राखेर ल्याएको भए पनि त्यसले बजारमा खास किसिमको प्रतिक्रिया देखाएन। साना समूह र यी नै समूहका कम्पनीमा टे«डरहरु झुम्मिरहेका छन्।
साना समूह पालैपालो उचाल्ने र गिराउने गर्दै कारोबार गर्ने कार्यमा लगानीकर्ता व्यस्त देखिन्छन्। पछिल्लो सेयर बजार नै लगानीमा भन्दा पनि बढी मात्रामा टे«डिङमा आधारित भएर अगाडि बढी रहेको छ। आजै लगानी गरेर तीन दिनमै नाफा कमाइहाल्ने भन्ने सोचमा लगानीकर्ता लागि परेका छन्। यसले गर्दा बैंक तथा बिमा कम्पनीको सेयर खरिदबिक्रीमा लगानीकर्ता अग्रसर भएको देखिँदैन।
यी ठूला समूह नचलेका कारणले नै समग्र नेप्से नै एउटै बिन्दुमा रुमल्लिरहेको छ। बैंक जस्ता ठुला समूह चलयमान नभएसम्म सूचक अझै यहि बिन्दुवरीपरी नै कायम रहने सम्भावना बढी देखिन्छ।
बजारमा ट्रेडर हाबी भएका नेपाल फाइनान्स, ङादी ग्रुप, आँखुखोला जलविद्युत्, जानाकी फाइनान्स, जोशी हाइड्रोपावर, नेसनल हाइड्रोपावर, एनआरएन इन्फ्रास्ट्रक्चर, बेस्ट फाइनान्स, वीन लघुवित्त, विशाल बजार जस्ता कम्पनीको सेयर कारोबार उच्च मात्रामा हुँदै आएको छ। यी र यस्तै प्रकृतिको कम्पनीको सेयर मूल्य नै कुनै साता उच्च मात्रामा बढ्ने र कुनै साता उच्च मात्रामा घट्ने भइरहेको छ।
गत साताको अन्तिम कारोबार दिन बिहीबार मात्रै पनि नेपाल फाइनान्सको सर्वाधिक अर्थात् ४२ करोड १९ लाख रुपैयाँ बराबरको सेयर कारोबार भएको थियो। उक्त दिन एनआरएनको २९ करोड ३ लाख रुपैयाँको, एलआइसी नेपालको २० करोड ८७ लाख रुपैयाँको, रसुवागढी हाइड्रोपावरको २० करोड ११ लाख रुपैयाँको, जानकी फाइनान्सको १३ करोड ९८ लाख रुपैयाँको, जोशी हाइड्रोपावरको १३ करोड ९७ लाख रुपैयाँको, रिभर फल्स पावरको १३ करोड ८५ लाख रुपैयाँको र सानीमा मिडल तमोर हाइड्रोपावरको १३ करोड ५९ लाख रुपैयाँ बराबरको सेयर खरिदबिक्री भएको थियो।
-1743570672.jpg)
