राष्ट्रपतिद्वारा भारतीय सेनाध्यक्षलाई मानार्थ महारथीको दर्ज्यानी चिन्ह प्रदान

राजनीति

गृहपृष्ठ
राजनीति

राष्ट्रपतिद्वारा भारतीय सेनाध्यक्षलाई मानार्थ महारथीको दर्ज्यानी चिन्ह प्रदान

क्यापिटल नेपालबिहीबार, मंसिर ६, २०८१

काठमाडौं। राष्ट्रपति रामचन्द्र पौडेलले भारतीय स्थल सेनाध्यक्ष उपेन्द्र द्विवेदीलाई मानार्थ महारथीको दर्ज्यानी चिन्ह तथा खड्ग प्रदान गरेका छन्।

नेपाली सेनाका परमाधिपतिसमेत रहेका राष्ट्रपति पौडेलले आज राष्ट्रपति भवन शीतलनिवासमा आयोजित विशेष समारोहमा भारतीय सेनाध्यक्षलाई दर्ज्यानी चिन्ह प्रदान गरेका हुन्। प्रधानसेनापति अशोकराज सिग्देलको निमन्त्रणामा सेनाध्यक्ष द्विवेदी बुधबार नेपाल आएका छन्।

समारोहमा उपराष्ट्रपति रामसहायप्रसाद यादव, प्रधानमन्त्री केपी शर्मा ओली, रक्षामन्त्री मानवीर राईलगायत विशिष्ट व्यक्ति उपस्थित थिए। नेपाल–भारतबीचको सैनिक सम्बन्धको निरन्तरतास्वरुप सन् १९५० देखि दुवै देशले एकअर्काका प्रधानसेनापतिलाई मानार्थ महारथीको दर्जा प्रदान गर्ने परम्परा छ।

यसअघि भारतका तत्कालीन राष्ट्रपति रामनाथ कोविंदले नेपालका तत्कालीन प्रधानसेनापति प्रभुराम शर्मालाई २०७८ कात्तिक २४ गते भारतीय स्थलसेनाको मानार्थ महारथीको दर्ज्यानी चिह्न प्रदान गरेका थिए।

तत्कालीन राष्ट्रपति विद्यादेवी भण्डारीले २०७९ भदौ २० गते भारतीय स्थल सेनाध्यक्ष मनोज पाण्डेलाई नेपाली सेनाको मानार्थ महारथी पद प्रदान गरेकी थिइन्।

सन् १९५० मा भारतका सेनाध्यक्ष जनरल केएम परिअप्पालाई पहिलो पटक नेपाली सेनाको मानार्थ महारथी प्रदान गरिएको थियो भने २०२६ मा तत्कालीन प्रधानसेनापति सुरेन्द्रबहादुर शाहलाई पनि पहिलो पटक भारतीय सेनाको मानार्थ महारथीबाट सुशोभित गरिएको थियो।

प्रकाशित मिति: बिहीबार, मंसिर ६, २०८१ १६:२८

प्रतिक्रिया दिनुहोस्