मनमोहक विश्व शान्ति स्तुपा (तस्बिरसहित)

फोटो फिचर

गृहपृष्ठ
फोटो फिचर

मनमोहक विश्व शान्ति स्तुपा (तस्बिरसहित)

क्यापिटल नेपालमंगलबार, मंसिर ४, २०८१

बुद्ध जन्मस्थल लुम्बिनीको प्रमुख आकर्षण हो, विश्व शान्ति स्तुपा। लुम्बिनी गुरु योजनाको उत्तरी क्षेत्रमा रहेको स्तुपा दर्शन तथा अवलोकनका लागि लुम्बिनी पुग्नेहरु त्यहाँ जान्छन्। मनमोहक र आकर्षक रहेको स्तुपा मुलुकको सबैभन्दा अग्लो स्तुपा हो।

यस स्तुपामा भगवान् बुद्धको पवित्र अस्तु धातु स्तूपको गर्भ र गजुरमा प्रतिस्थापित गरिएकाले पनि शान्तिका अनुयायीको आस्था र पवित्र केन्द्र बनेको छ।

निप्पोजान म्याहोजी संस्थाका संस्थापक फुजी गुरुले उक्त स्तुप निर्माण गरेका हुन् । स्वर्गिय जापानी निचिडात्सु फुजी गुरुले विश्वभरि बनाएका ८० बढी विश्व शान्ति स्तुपामध्ये यो एक हो। ७ वर्ष लगाएर निर्माण गरिएको शान्ति स्तुपा ४१.५ मिटर अग्लो र २० मिटर गोलाइको छ।

स्तुपाको आधारस्तम्भ ५९ मिटर गोलाइको छ। ९ सय मेट्रिक टन सिमेन्ट लागेको उक्त स्तुपामा २७ हजार स्क्वायर फुट मार्बल प्रयोग गरिएको छ। २०५० कात्तिक २८ मा स्व. गिरिजाप्रसाद कोइरालाबाट शिलान्यास गरिएको स्तुपा ०५८ कात्तिक १८ मा उनैले उद्घाटन गरेका थिए।

दोस्रो विश्वयुद्धताका हिरोसिमा र नागासाकीमा आणविक अस्त्रको प्रहारद्वारा असंख्य मानवीय नरसंहार दर्दनाक दृश्यबाट भावविह्वल भई जापानका फुजी गुरुजीले संसारभरि नै शान्ति स्तुपा निर्माण थालेका हुन्।

संहारपछि शान्तिको विकल्प छैन भन्दै जापानी निचिडात्सु फुजी गुरु शान्तिको खोजीमा लागे। यही क्रममा उनी लुम्बिनी आई अग्लो विश्व शान्ति स्तुपा निर्माण थालेका थिए।