काठमाडौं । घरजग्गा व्यवसायी विक्रम लामामाथि आक्रमण गरेको आरोपमा थप एक जना पक्राउ परेका छन् । पक्राउ पर्नेमा निश्चल सुनार छन् । उनलाई झापाबाट पक्राउ गरेर काठमाडौं ल्याइएको जिल्ला प्रहरी परिसर काठमाडौंका एसपी तथा प्रवक्ता नवराज अधिकारीले बताए ।
कात्तिक ११ गते लाजिम्पाटस्थित इनोभा अस्पतालको पार्किङमा नुवाकोटको ककनी गाउँपालिका-६ का ३५ व्यवसायी लामाथि रड प्रहार भएको थियो । चार जनाको समूहले आक्रमण गरेको बताइए पनि दुई जना अझै फरार छन् । आक्रमण गर्ने समूहका ‘मार्शल’ भनिने शैलेन्द्र तामाङलाई घटना भएकै दिन प्रहरीले पक्राउ गरेको थियो ।
प्रहरीका अनुसार आक्रमणमा तामाङका साथै अजय लामा, निश्चल सुनार र दीपक बरामु संलग्न थिए । अझै यो समूहका अज र दीपक पक्राउ पर्न बाँकी रहेका छन् । आक्रमणको मुख्य योजनाकार अजय प्रहरीको प्रहरीको भनाइ छ ।
प्रहरी स्रोतका अनुसार आक्रमणको योजना बनाएपछि आक्रमणकारीले चार वटा नयाँ मोबाइल सेट र सिमकार्ड किनेका थिए । त्यसपछि ती फोन र सिमकार्ड समेत प्रयोग भएको छैन ।
आक्रमणको मुख्य योजनाकार अजय पक्राउ परेपछि मात्रै यकिन कारण खुल्न सक्ने प्रहरी अधिकारीहरु बताउँछन् । आक्रमण गर्ने योजना बनाएपछि अजयले कफी खान भन्दै विक्रमलाई बोलाएको र त्यसैबेला अरु तीन जनाको विक्रमसँग भेट भएको खुलेको छ ।
यता पीडित पक्षले भने हाल बेलायतमा रहेकी एक महिलाले हत्या गर्ने उद्देश्यले सुपारी दिएर आपराधिक समूह परिचालन गरेको दाबी प्रहरी समक्ष गरेको छ । पीडित पक्षले बेलायतमा रहेकी भनिएकी महिला नातेदारसमेत रहेको र एक क्रसरमा संयुक्त लगानी समेत रहेको, पछिल्लो समय सम्बन्धमा दरार आएपछि मार्नेसम्मको योजना बनाएर आक्रमण भएको दाबी उनीहरुको छ ।
गत वर्ष पनि आफूमाथि यस्तै आक्रमणको योजना बनेको सूचना आएको विक्रमले प्रहरीसमक्ष दाबी गरेका छन्
