सहकारी ठगी प्रकरणः रुपन्देहीमा तीन दिन बयान लिइएपछि कास्की लगिँदै रवि

सहकारी

गृहपृष्ठ
सहकारी

सहकारी ठगी प्रकरणः रुपन्देहीमा तीन दिन बयान लिइएपछि कास्की लगिँदै रवि

क्यापिटल नेपालशुक्रबार, कात्तिक ३०, २०८१

काठमाडौं। सहकारी ठगी प्रकरणमा गत कात्तिक २७ मा कास्कीबाट रुपन्देहीको भैरहवा ल्याइएका राष्ट्रिय स्वतन्त्र पार्टी (रास्वपा) का सभापति रवि लामिछानेलाई आज कास्की लगिने भएको छ।

प्रहरी सहकारी ठगी र संगठित अपराधको कसुरमा कास्की प्रहरी हिरासतमा रहेका पूर्वगृहमन्त्रीसमेत रहेका रविलाई बुटवलस्थित सुप्रिम सहकारीको बचत अपचलनबारे केरकार गर्न भैरहवा लगिएको थियो। बयान सकिएसँगै उनलाई आज बिहान ७ः४० बजे बुद्ध एयरको जहाजबाट पोखरा लगिने भनिए पनि मौसम अनुकूल हुँदा ढिलाइ भएको जिल्ला प्रहरी कार्यालय रुपन्देहीकी डिएसपी लक्ष्मी खनालले बताइन्।

रविसँग सुप्रिम सहकारी ठगी प्रकरणबारे जिल्ला सरकारी वकिलको कार्यालयमा तीन दिन झन्डै साढे २३ घन्टा बयान लिइएको थियो।

लामिछानेसँग जिल्ला न्यायाधिवक्ता प्रेमराज पौडेलको कार्यकक्षमा इलाका प्रहरी कार्यालय बुटवलका प्रमुख प्रहरी नायब उपरिक्षक विजयराज पण्डित र अन्य अनुसन्धान अधिकृतले बयान लिएका थिए।रविसँग गोर्खा मिडिया र सहकारीको रकम हिनामिना वरपर रहेका प्रश्न सोधिएको थियो।

पोखराको सूर्यदर्शन सहकारीको रकम अपचलन गरेको आरोपमा कात्तिक २ गते पक्राउ परेका लामिछाने बुटवलको सुप्रिमको रकम हिनामिनामा समेत संलग्न रहेको भन्दै बयानका लागि रूपन्देही लगिएको थियो।

रविकै नाममा सुप्रिम सहकारीबाट १ करोड ९६ लाख र १४ करोड २९ लाख उबेला प्रबन्ध निर्देशक रहेको गोर्खा मिडिया नेटवर्कमा विभिन्न व्यक्तिमार्फत लगिएको संसदीय छानबिन विशेष समिति र प्रहरी प्रतिवेदनले औंल्याएको छ।

प्रकाशित मिति: शुक्रबार, कात्तिक ३०, २०८१ ११:०४

प्रतिक्रिया दिनुहोस्