विद्युत् प्राधिकरणले मन्त्रिपरिषद् निर्णय कार्यान्वयन गर्ने, उद्योगमा काटिएको लाइन जोडिने

उद्योग

गृहपृष्ठ
उद्योग

विद्युत् प्राधिकरणले मन्त्रिपरिषद् निर्णय कार्यान्वयन गर्ने, उद्योगमा काटिएको लाइन जोडिने

क्यापिटल नेपालमंगलबार, कात्तिक २७, २०८१

काठमाडौं। नेपाल विद्युत प्राधिकरण सञ्चालन समिति (बोर्ड) बैठकले उद्योगहरुमा काटिएको बिजुली जोड्ने निर्णय गरेको छ। मंगलबार ऊर्जा, जलस्रोत तथा सिँचाइ मन्त्रालयमा बसेको प्राधिकरण बोर्ड बैठकले उक्त निर्णय गरेको मन्त्रालयका सचिव एवं बोर्ड सदस्य सुरेश आचार्यले जानकारी दिए।

उनका अनुसार आइतबार बसेको मन्त्रीपरिषद्को निर्णयको चिठ्ठी सोमबार अपरान्ह प्राधिकरण पुगेको थियो। उक्त चिठ्ठी प्राप्त भएको २४ घण्टा भित्र उद्योगहरुमा बिजुली जोड्नु पर्ने निर्णय मन्त्रीपरिषद्ले गरेको छ। ‘बोर्ड बैडकले निर्णय गरेर बिजुली जोड्ने भनिसकेको छ, अब जोड्ने काम प्राधिकरणको हो, भरेसम्म जोडिएला’ सचिव आचार्यले भने।

डेडिकेटेड र ट्रंक लाइनको बक्यौता तिर्न ३ महिनाको समय सकिएको भन्दै विद्युत प्राधिकरणले कात्तिक ८ मा ३४ उद्योगमा बिजुलीको लाइन काटेको थियो। ऊर्जामन्त्री दीपक खड्काले लाइन नकाटी समस्याको समाधान गर्न निर्देशन दिँदादिँदै प्राधिकरणका प्रबन्ध निर्देशक कुलमान घिसि‌ङले कात्तिक ८ को राती ३४ उद्योगमा लाइन काटेका थिए।

कात्तिक २५ मा बसेको मन्त्रीपरिषद् बैठकले डेडिकेटेड र ट्रंक लाइनको बक्यौता विवाद समाधानका लागि गठित लाल आयोगले तयार गरेको प्रतिवेदन सार्वजनिक गर्ने तथा उद्योगमा २४ घण्टा भित्र बिजुली जोड्न निर्देशन दिने निर्णय गरेको थियो।

सोहीअनुसार सोमबार साँझ ऊर्जा मन्त्रालयले प्रतिवेदन सार्वजनिक गरिसकेको छ। साथै आज प्राधिकरणको बोर्ड बैठकले मन्त्रीपरिषद्को निर्णयअनुसार लाइन काटिएका उद्योगमा बिजुली जोड्ने निर्णय गरेको हो।

प्रकाशित मिति: मंगलबार, कात्तिक २७, २०८१ १६:५०

प्रतिक्रिया दिनुहोस्