काठमाडौं। लिप मोटरले २०२४ को तेस्रो त्रैमासमा ऐतिहासिक उपलब्धि हासिल गर्दै विद्युतीय सवारी साधनको बजारमा आफ्नो बलियो उपस्थिति स्थापित गरेको छ। तेस्रो त्रैमासिकमा कम्पनीले कुल ८६ हजार १६५ गाडी बिक्री गरेको छ, जुन अघिल्लो त्रैमासिकको तुलनामा ६१.७ प्रतिशत बढी हो। यससँगै, २०२४ को पहिलो तीन त्रैमासिकसम्ममा कम्पनीले १ लाख ७२ हजार ८६१ सवारीसाधन बिक्री गरिसकेको छ, जसले वार्षिक आधारमा ९४.६ प्रतिशतको वृद्धि देखाएको छ।
अक्टोबरमा मात्र कम्पनीले ३८ हजार १७७ युनिट बिक्री गरेको छ, जुन नयाँ रेकर्ड हो। यससँगै कम्पनीले अक्टोबर महिनामा ४० हजार भन्दा बढी नयाँ अर्डर पनि प्राप्त गरेको छ। यसले लिप मोटरलाई यस वर्षको २ लाख ५० हजार सवारी साधनको वार्षिक बिक्री लक्ष्य पार गर्न मद्दत गर्ने देखिन्छ।
कम्पनीको मासिक बिक्रीदर पनि निरन्तर उकालो लागिरहेको छ। जुलाईमा २२ हजार ९३, अगस्टमा ३० हजार ३०५ र सेप्टेम्बरमा ३३ हजार ७६७ गाडी बिक्री भएको थियो। सेप्टेम्बरको अन्त्यसम्ममा लिप मोटरले कुल १. लाख ७२ हजार ८६१ युनिट बिक्री पुरा गरिसकेको छ। कम्पनीले २०२४ को अक्टोबर १७ मा आफ्नो ५ लाख सवारी साधन उत्पादन गरेर थप एक महत्वपूर्ण माइलस्टोन प्राप्त गरेको छ। यस अवधिमा, लिप मोटरले नयाँ ऊर्जा ब्रान्डहरूको बिक्रीमा शीर्ष तीन स्थानमा आफूलाई राख्न सफल भयो। सेप्टेम्बरको अन्तिम हप्ता कम्पनीले एकै हप्ता १० हजार युनिटभन्दा बढी बिक्री गरेर दोस्रो स्थान हासिल गरेको छ।
वित्तीय दृष्टिकोणले पनि लिप मोटरले उल्लेखनीय प्रगति गरेको छ। तेस्रो त्रैमासिकमा कम्पनीको कुल राजस्व ९.८६ अर्ब युआन (लगभग १.३६ अर्ब अमेरिकी डलर) पुगेको छ, जुन वार्षिक आधारमा ७४.३ प्रतिशतको वृद्धि हो। यस त्रैमासिकको ग्रस प्रॉफिट मार्जिन ८.१ प्रतिशतमा सुधार भएको छ। यसमा प्रमुख कारणहरूमा उत्पादनहरूको सन्तुलित मिश्रण, लागत नियन्त्रण, र बढ्दो बिक्रीका कारण अर्थतन्त्रमा आएको सुधार सामेल छ। यद्यपि लिप मोटरले २०२४ मा ६९० मिलियन युआन (९५ मिलियन अमेरिकी डलर) को वार्षिक घाटा ब्यहोरेको छ, कम्पनीले २०२५ सम्ममा घाटा कम गर्दै ब्रेक–इभनमा पुग्ने अपेक्षा राखेको छ।
कम्पनीको तीव्र गतिमा विस्तार भइरहेको बिक्री नेटवर्क यस सफलताको महत्वपूर्ण पक्ष हो। सेप्टेम्बरको अन्त्यसम्ममा, लीप मोटरले २०४ शहरहरूमा ४९३ विक्री स्टोर र ३६२ सेवा केन्द्रहरूको स्थापना गरिसकेको छ। अन्तर्राष्ट्रिय स्तरमा पनि कम्पनीले ठुलो प्रगति गरेको छ। युरोपमा ३३९ डिलरशिपहरू खोल्दै, कम्पनीले युरोपेली बजारमा व्यापक उपस्थिति जमाएको छ, जसमा विक्री र सेवा दुवै सुविधा उपलब्ध छन्। आगामी वर्षहरूमा कम्पनीले एशिया–प्यासिफिक, मध्यपूर्व, अफ्रिका, र दक्षिण अमेरिकी बजारहरूमा विस्तार गर्ने योजना बनाएको छ, जसले २०२५ सम्ममा ५०० भन्दा बढी स्थानमा आफ्नो उपस्थितिलाई सुदृढ गर्ने लक्ष्य राखेको छ।
लिप मोटरको बढ्दो बिक्री र विस्तारले विश्वव्यापी ईभी बजारमा एक महत्वपूर्ण खेलाडीको रूपमा यसको स्थानलाई थप सुदृढ बनाएको छ। आफ्नो बढ्दो बजार पहुँच र बिक्री संख्याको साथ, कम्पनीले निकट भविष्यमा अन्तर्राष्ट्रिय स्तरमा आफ्नो प्रतिस्पर्धा क्षमता बढाउँदै लैजाने अपेक्षा राखेको छ।
