नेपालको सहरीकरणमा देखिएका चुनौती सम्बोधन गर्न राष्ट्रसंघसँग सहकार्यः उपप्रधानमन्त्री सिंह

पूर्वाधार

गृहपृष्ठ
पूर्वाधार

नेपालको सहरीकरणमा देखिएका चुनौती सम्बोधन गर्न राष्ट्रसंघसँग सहकार्यः उपप्रधानमन्त्री सिंह

क्यापिटल नेपालशुक्रबार, कात्तिक २३, २०८१

काठमाडौं। उपप्रधान एवं सहरी विकासमन्त्री प्रकाशमान सिंहले नेपालको प्रमुख सहरी चुनौती सम्बोधन गर्न संयुक्त राष्ट्रसंघ र यूएन ह्याबिटेटसँग सहकार्य गरिने बताएका छन्।

इजिप्टको कायरोमा जारी वल्र्ड अर्बान फोरममा शुक्रबार यूएन ह्याबिटेटका एसिया र प्रशान्त क्षेत्रीय प्रतिनिधि (आरओएपी) काजुको इसिगाकी र नेपालका लागि संयुक्त राष्ट्रसंघीय आवासीय प्रतिनिधि हाना सिंगर ह्याम्डीसँगको द्विपक्षीय बैठकमा उपप्रधानमन्त्री सिंहले नेपालले सामना गरिरहेका प्रमुख सहरी चुनौती सम्बोधन गर्न सहकार्यको महत्त्वमा जोड दिएका हुन्।

भेटमा आरओएपीका प्रतिनिधि इसिगाकीले तथ्य र तथ्यांकमा आधारित योजनामा यूएन ह्याबिटेटको निरन्तर सहयोग रहने जनाएका छन्। त्यसैगरी नेपालका लागि आवासीय प्रतिनिधि ह्याम्डीले दिगो सहरीकरणका लागि बलियो सहकार्य गर्न संयुक्त राष्ट्रसंघको समर्थन रहने बताए।

दिगो विकासका लक्ष्यलाई स्थानीयकरण गर्न र सहरी योजनालाई मुख्य प्रवाहमा ल्याउने जटिल सहरी चुनौती सामना गर्न यूएन ह्याबिटेटको भूमिकामा समेत आवासीय प्रतिनिधि ह्याम्डीले जोड दिए।

विश्व फोरममा नेपालका तर्फबाट मन्त्री सिंहले तीन वटा सत्रमा सम्बोधन गरेका थिए। उनले नेपालमा जलवायु परिवर्तनले पारेको असरबारे चर्चा गर्दै जलवायु न्यायको माग गरे।

नेपालजस्ता विकासोन्मुख देशले धेरै कम कार्बन उत्सर्जन गरे पनि जलवायु परिवर्तनको प्रत्यक्ष असर धेरै देखिएकाले अन्तर्राष्ट्रिय स्तरको जलवायु वित्तमा सजिलो पहुँच र प्राविधिक सहयोगमार्फत मात्र जलवायु न्याय हुने कुरा विश्व समुदायसमक्ष जोडदार रुपमा उठाएका छन्। इजिप्टको कायरोमा नोभेम्बर ४ बाट सुरु भएको फोरम आज समापन हुँदै छ।

प्रकाशित मिति: शुक्रबार, कात्तिक २३, २०८१ १३:३३

प्रतिक्रिया दिनुहोस्