काठमाडौं। नियामक निकायले सेवाप्रदायकलाई लागू गर्ने सम्पूर्ण नियम कानुन एउटै हुनुपर्छ र हुन्छ। र, सेवा प्रदायकले पनि नियामकले लागू गरेको सम्पूर्ण नियमहरु सानो होस या ठूला सबै कम्पनीहरुले अनिवार्य रुपमा लागू गरेकै हुन्छन् र गर्नुपर्छ। तर, उड्डयन क्षेत्रको नियामक निकाय नेपाल नागरिक उड्डयन प्राधिकरणले विन्टर सिजनका लागि स्वीकृत गरेको नयाँ उडान तालिकामा भने आफ्ना सेवा प्रदायक कम्पनी(एयरलाइन्स)लाई विवेद गरेको पाइएको छ।
खासगरी कात्तिक २३ देखि चैत १८ गतेसम्म त्रिभुवन अन्तर्राष्ट्रिय विमानस्थल दैनिक १० घण्टा बन्द हुने भएपछि प्राधिकरणले आन्तरिक एवंम बाह्य उडानमा भारी रुपमा कटौती गरेको हो। प्राधिकरणले स्वीकृत गरेको नयाँ तालिका अनुसार आन्तरिक तर्फ ३५ प्रतिशत उडान कटौती भएको छ। त्यस मध्ये सबैभन्दा बढी यती र श्री एयरलाइन्सको उडान कटौती भएको हो।
यती र श्रीको तुलनामा बुद्धको २० प्रतिशत मात्र उडान कटौती भएको देखिन्छ। जहाज र गत महिनाको उडान संख्यालाई हेर्दापनि यती/श्रीलाई दिएको उडान तालिकामा विभेद भएको भन्दै प्राधिकरणमा संशोधनका लागि निवेदन समेत दर्ता भएको छ। ३५ प्रतिशत उडान कटौतीको तालिकामा बुद्धलाई ‘फेबर’, यती/श्रीले बुझाए संशोधन गर्न पत्र
प्राधिकरणले स्वीकृत गरेको नयाँ तालिका अनुसार बुद्धले सबैभन्दा बढी दैनिक १३९, यतीले ४१ र श्रीले ३१ उडान गर्न पाउने छन्। यो भनेको एक तर्फि उडान बुद्धलाई ७०, यतीलाई २० र श्रीलाई १५ हुन आउछ। यस अघि पनि बुद्धले दैनिक ७५ देखि अधिकतम ८० उडान सम्म गर्दै आएको थियो।
यस्तै यतीले ३८ देखि ४० र श्रीले २० देखि २२ उडान गर्दै आएको थियो। यो भनेको दुईतर्फि उडान बुद्धको १६०, यतीको ८० र श्रीको ४४ उडानसम्म हुने गरेको थियो। यस्तै नेपाल एयरलाइन्सले ४, तारा एयरले ५, समिट एयरले ४ र सिता एयरले ६ उडान पाएको छ। योसँगै अव दैनिक २३० उडान मात्र त्रिभुवन अन्तर्राष्ट्रिय विमानस्थलमा आन्तरीक उडान हुने छ। यस अघि दैनिक ३५६ उडान हुने गरेको थियो।
बुद्धसँग १७ वटा जहाज मध्ये १४ वटाले मात्र उडान गरिरहेको छ। श्रीसँग ११ र यतीसँग ७ वटा जहाज रहेको छ। श्रीले पनि सबै जहाजबाट नियमित उडान गर्दैन।
विमानस्थलको क्षमता विस्तारका लागि राती १० देखि बिहान ८ बजेसम्म विमानस्थलमा उडान–अवतरण बन्द हुनेछ। हाल बिहान ६ देखि राती २ बजे बन्द हुँदै आएको त्रिभुवन अन्तर्राष्ट्रिय विमानस्थल दैनिक २१ घन्टा सञ्चालन भइरहेको छ।
