काठमाडौं। अमेरिकी राष्ट्रपतिका लागि मंगलबार भएको निर्वाचनमा डेमोक्र्याटिक पार्टीबाट उम्मेद्वार रहेकी उपराष्ट्रपति कमला ह्यारिस र रिपब्लिकन उम्मेद्वार पूर्वराष्ट्रपति डोनाल्ड ट्रम्पबीच कडा प्रतिस्पर्धा देखिएको अमेरिकी सञ्चार माध्यमले जनाएका छन्।
अमेरिकी सञ्चार माध्यमका अनुसार अहिलेसम्म उपराष्ट्रपति ह्यारिसले क्यालिफोर्निया, न्यूयोर्कलगायत १४ वटा राज्यमा बहुमत ल्याउने सुनिश्चित भएको छ भने नेता ट्रम्पले टेक्सास, ओहायो, नर्थ क्यारोलाइना र अन्य भरपर्दो रिपब्लिकन झुकाव भएका राज्यसहित २३ राज्यमा जित हासिल गर्ने देखिएको छ। अहिलेसम्म ट्रम्पले २४३ र ह्यारिसले १९४ इलेक्टोरल मत प्राप्त गरेका छन्।
राष्ट्रपति पदमा जितका लागि जादूयी इलेक्टोरल संख्या २७० रहेको छ। पर्यवेक्षकले ह्वाइट हाउसका लागि भएको निर्वाचनमा यस पहिले नै प्रक्षेपण गरिएअनुसार दुवै उम्मेदवारको झन्डै बराबर मत रहेको अनुमान गरिएका केही राज्य निर्णायक हुनेछन्।
एपी, सीएनएन, फक्स न्यूज, एमएसएनबीसी÷एनबीसी न्यूज, एबीसी र सीबीएसलगायत अमेरिकी मिडियाको अनुमानको आधारमा प्रत्येक उम्मेदवारले जितेका राज्यको सूची र इलेक्टोरल मतको सम्बन्धित संख्या निम्नानुसार छः
डेमोक्र्याटिक नेतृ ह्यारिसले पाएको कुल १९४ इलेक्टोरल मतमध्ये क्यालिफोर्नियामा ५४, कोलोराडोमा १०, कनेक्टिकटमा सात, डेलावेयरमा तीन, कोलम्बियामा तीन, हवाईमा चार, इलिनोइसमा, १९, मेरिल्यान्डमा १०, म्यासाचुसेट्समा ११ र न्यू मेक्सिकोमा पाँच, न्यूयोर्कमा २८, ओरेगनमा आठ, रोएड आइल्यान्डमा चार, भर्मोन्टमा तीन, भर्जिनियामा १३, वासिङ्टनमा १२ रहेका छन्।
त्यसैगरी ट्रम्पले पाएको कुल २४३ इलेक्टोरल मतमध्ये अलबामामा ९, अर्कान्ससमा ६, फ्लोरिडामा ३०, आइडाहामो चार, इन्डियानामा ११, आयोवामा ६, कन्सासमा ६, केन्टकीमा आठ, लुसियानामा ६, मिसिसिपीमा ६, मिसौरीमा १०, मोन्टानामा चार, नर्थ क्यारोलिनामा १६, नर्थ डकोटामा तीन, ओहायोमा १७, ओक्लाहोमा सात, साउथ क्यारोलिनामा ९, साउथ डकोटामा तीन, टेनिसीमा ११ टेक्सासमा ४०, यूटामा ६, वेस्ट भर्जिनियामा चार र वायोमिङमा तीन रहेका छन्।–एजेन्सी
-1732445197.jpg)
