काठमाडौं। सभामुख देवराज घिमिरेले संसदीय समितिमा विचाराधीन विधेयकलाई आगामी अधिवेशनमा पेस गर्न निर्देशन दिएका छन्।
सिंहदरबारस्थित सभामुखको कार्यकक्षमा आज बसेको संसदीय समितिका सभापति र प्रमुख दलका प्रमुख सचेतक तथा सचेतकसँगको बैठकमा उनले यस्तो निर्देशन दिएका हुन्।
बैठकमा सभामुख घिमिरेले ‘कुन समितिमा कति विधेयक छन्? त्यसलाई पास गर्न कति समय लाग्छ’ भनेर चासो देखाएको उद्योग, तथा वाणिज्य र श्रम तथा उपभोक्ता हित समितिका सभापति अब्दुल खानले जानकारी दिए।
छलफलमा समिति सभापतिले संसद् अधिवेशन अन्त्य भएसँगै बैठक बस्न नसकेको जानकारी सभामुखलाई दिएका थिए। उद्योग, तथा वाणिज्य र श्रम तथा उपभोक्ता हित समितिका सभापति खानले भने, ‘हामी समितिका सभापति अधिकांश सांसद गृहजिल्ला गएकाले बैठक बस्न कोरमसमेत नपुगेको विषय सभामुखसँग राख्यौँ।’
सभामुख घिमिरेले बिहान ११ः३० बजे दफावार छलफलका लागि विधेयक रहेका समितिका सभापति र प्रमुख दलका प्रमुख सचेतकसँग छलफल गरेका हुन्। संसद्को आगामी अधिवेशनमा बिजनेसको अभाव हुन नदिन सभामुखले सभापतिहरूलाई बोलाएको उनको सचिवालयले जनाएको छ।
बैठकमा एमालेका मुख्य सचेतक महेश कुमाल बर्तौला, कांग्रेस प्रमुख सचेतक श्यामकुमार घिमिरे, माओवादी केन्द्रका प्रमुख सचेतक हितराज पाण्डे, राष्ट्रिय स्वतन्त्र पार्टीका प्रमुख सचेतक सन्तोष परियार र राष्ट्रिय प्रजातन्त्र पार्टीका प्रमुख सचेतक ज्ञानबहादुर शाही उपस्थित थिए। एमालेका मुख्य सचेतक बर्तौलाले सभामुखले विशेषगरी संसदीय समितिको बैठक राख्नका लागि निर्देशन दिएको जानकारी दिए।
