चितवन। नारायणगढ–मुग्लिन सडक खण्डमा निर्माणाधीन १४ पुल कात्तिक मसान्तसम्म सञ्चालनमा ल्याइने भएको छ। खहरे खोलाको पुलको पहुँच सडक सम्पन्न गर्न थप दुई महिना लाग्ने भए पनि अन्य पुल यसै महिनाभित्र सञ्चालनमा ल्याउन लागिएको हो।
नागढुंगा–मुग्लिन सडक आयोजना पश्चिम खण्ड (नारायणगढ–मुग्लिन) का इन्जिनियर कृष्ण आचार्यका अनुसार मुग्लिन बजार नजिकैको काली खोलाको पुल दसैंअगाडि नै सञ्चालनमा आएको हो भने नाम्चे र तुइनखोला पुल कात्तिक मसान्तसम्म सञ्चालनमा ल्याउने गरी काम भइरहेको छ। ती दुवै पुलको कालोपत्रेको अन्तिम काम र रंगरोगन मात्र बाँकी छ।
आचार्यले भने, ‘दसैंमा कामदार घर गएकाले केही ढिला भयो। यो महिनाको मसान्तसम्म काम सकिन्छ।’ पहरो काटेर निर्माण भइरहेको खहरे खोलाको पुलमा पहुँच सडकका लागि धेरै तलबाट पर्खाल लगाउनुपर्ने भएकाले थप दुई महिना लाग्ने उनले बताए। पुस मसान्तसम्म यो सडकका १९ वटै पुल निर्माण सम्पन्न हुने आचार्यको भनाइ छ।
यो सडकमा १९ वटा पुल छन्। त्यसमध्ये २०७६ चैत १० गते १५ पुल निर्माणका लागि ठेक्का सम्झौता भएको थियो। यसअघि चार नयाँ पुल निर्माण गरिएको थियो। विश्व बैंकको सहयोगमा ती पुल निर्माण गरिएका हुन्। सडक चौडा भएपछि पुलको काम थालिएको हो।
यो सडक ९ देखि ११ मिटरसम्म फराकिलो बनाइएको छ। पुलसमेत ११ मिटर फराकिला बनाइएको छ। पुल निर्माण अनक कन्स्ट्रक्सनले गरेको हो। २०७६ चैतमा १ अर्ब २७ करोडको लागतमा पुल निर्माणको ठेक्का सम्झौता भएको थियो। तीन वर्षका लागि दुई प्याकेज बनाएर ठेक्का लगाइएकामा दुवै प्याकेज अनक कन्स्ट्रक्सनले पाएको थियो।
तुइन खोलामा भित्तो काट्नुपर्ने भएकाले र खहरेमा मुआब्जाका कारण काम ढिलो भएको हो। यो सडक राजधानी छिर्ने र बाहिरिने मुख्य राजमार्ग हो। विगत वर्षमा पहिरोका कारण वर्षायाममा धेरै सास्ती बेहोर्नुपर्ने भए पनि पछिल्लो समय सडक र पुल फराकिलो भएसँगै केही सहज हुँदै गएको छ।–रासस
