काठमाडौं। भाटभटेनी सुपरमार्केटका अध्यक्ष मीनबहादुर गुरुङले बाढीपीडितका लागि १ करोड ११ लाख ११ हजार १११ रुपैयाँ सहयोग हस्तान्तरण गरेका छन्। प्रधानमन्त्री केपी शर्मा ओलीलाई उक्त सहयोग रकमको चेक हस्तान्तरण गरेका हुन्। प्रधानमन्त्री ओलीले उक्त चेक गृहमन्त्री रमेश लेखकलाई बुझाएका छन्।
पछिल्लो अविरल वर्षापछिको बाढीपहिरोले मा हजारौं नागरिक विस्थापित हुने अवस्था आएको भन्दै सरकारी राहत कोषमा सहयोग जम्मा गरेको बताए। उनले भने, ‘अहिले बाढीपीडितका लागि १ करोड ११ लाख ११ हजार १११ रुपैयाँ सहयोग दिएको हुँ।’
भाटभटेनीका सीओओ पानु पौडेलले घोषणा गरिएको रकम सरकारलाई हस्तान्तरण गरेको जानकारी दिए। बिहीबारदेखि परेको अविरल वर्षापछि देशभर १९३ जनाको मृत्यु भएको सरकारी तथ्यांक छ भने अझै पनि ३५ जना बढी बेपत्ता छन्।
अर्बौं रुपैयाँको क्षति भएको हुँदा मुलुकलाई अप्ठेरो परेका बेला सहयोग गर्नु नागरिकको दायित्व पनि भएको उनको भनाइ छ। गुरुङले यसअघि डा. भगवान कोइरालाको नेतृत्वमा रहेको बाल अस्पताल निर्माणका लागि ४१ करोड रुपैयाँ बराबरको सहयोग गरेका छन्। उक्त अस्पताल अहिले निर्माणाधीन अवस्थामा छ।
अघिल्लो वर्ष जाजरकोटमा गएको भूकम्पपछि उनीहरुको उद्धार र राहतका लागि गुरुङले १ करोड ११ लाख ११ हजार १११ रुपैयाँ सहयोग गरेका थिए। त्यसबाहेक ८० लाख रुपैयाँ बराबरको खाद्यान्न उक्त क्षेत्रमा पठाएका थिए।
कोभिडका बेला पनि संघीय सरकारसहित सातै प्रदेशमा उनले सहयोग हस्तान्तरण गरेका थिए। त्यसअघि २०६८ मा त्रिवि शिक्षण अस्पतालमा दुईवटा भवन निर्माण गरिदिएका थिए। ११ करोड लागतमा इमर्जेन्सी भवन बनाइदिएका थिए भने ईएचएस भवन १५ करोड लागतमा तयार पारिदिएका हुन्।
गुरुङले अहिलेसम्म १४ जनालाई एमबीबीएसको अध्ययन पनि गराएका छन्। रोल्पा, खोटाङ, मुगु, डोल्पा, बैतडी, दार्चुला, संखुवासभा, ताप्लेजुङ, पाँचथर र कालीकोटका गरी १४ जना डाक्टर बने र धेरैले स्थानीय तहमै जनताको सेवा गरेर बसेका छन्।
उनीहरुको पढाइको सम्पूर्ण खर्च भाटभटेनीले बेहोरेको थियो। उनीहरू त्यसबापत स्थानीय तहमा जनताको सेवा गर्ने प्रतिबद्धता जनाएका थिए।
