काठमाडौं। मोबाइल सेवाप्रदायक कम्पनी एनसेलको सामाजिक संस्था एनसेल फाउन्डेसनले पेरिस पारालिम्पिक्स २०२४ मा गौरवमय इतिहास रच्दै नेपाली खेलकुदको क्षेत्रमा देशको लागि अहिलेसम्मकै ठूलो पदक दिलाउन सफल पारा तेक्वान्दो खेलाडी पलेशा गोवर्धनलाई १० लाख नगद पुरस्कारसहित सम्मान गरेको छ।
राष्ट्रिय पारालिम्पिक कमिटी (एनपीसी) नेपालको २५औं वार्षिकोत्सव अवसरमा आयाेजित कार्यक्रममा एनसेलले पेरिस पारालिम्पिककी कास्य पदक विजेता पलेशासहित सहभागी ५ सदस्यीय टोलीलाई नगदसहित पुरस्कृत हो।
कम्पनीले व्यावसायिक सामाजिक जिम्मेवारी (सीएसआर)अन्तर्गत एनसेल फाउन्डेसनबाट यो पुरस्कार प्रदान गरेको हो।
पलेशाकी पारा तेक्वान्दो प्रशिक्षक कविराज नेगी लामाले ३ लाख नगद पुरस्कार पाएका छन्। त्यसैगरी तेक्वान्दो खेलाडी भरहसिंह महता, पौडी खेलाडी भीमबहादुर कुमाल, र पौडी प्रशिक्षक विजेनमान श्रेष्ठले जनही १ लाख नगद पुरस्कार प्राप्त गरेका छन् ।
‘यो सम्मानले पारा खेलाडीको हौसला झन् बढाएको छ र अब देशका लागि स्वर्ण पदक नै ल्याउने मेरो उद्देश्य रहेको छ। एनपीसीसँगको सहकार्यमा हाम्रो ओझेल परेको पारा खेलकुदको विकासमा योगदान पुर्याइएकोमा एनसेलप्रति आभारी छु’, पलेशाले भनिन् ।
पारा खेलाडीलाई युवा तथा खेलकुद मन्त्री तेजुलाल चौधरी, एनसेलका प्रमुख नियामक मामिला अधिकृत विशालमणि उपाध्याय, एनपीसीकी अध्यक्ष राधा घले र एनसेलकी कर्पोरेट कम्युनिकेसन एन्ड सीएसआर हेड विशाखालक्ष्मी खड्काले संयुक्त रुपमा पुरस्कार वितरण गरेका थिए।
कार्यक्रममा एनपीसी नेपालले पारालिम्पिक खेलप्रति चासो राखी यसको विकासमा पुर्याएको सहयोगको मूल्यांकन गर्दै पारा खेलाडीलाई उच्च मनोबल र हौसला प्रदान गरकोमा एनसेललाई पनि सम्मान गरेको छ। युवा तथा खेलकुद मन्त्री चौधरीलगायतले एनसेललाई सोे सम्मान गरेका हुन्।
‘एनसेल फाउन्डेसनको भर्खरै भएको शुभारम्भसँगै देशको लागि ऐतिहासिक पदक दिलाउन सफल पलेशासहित अन्य पारालिम्पियनलाई नगद पुरस्कारले सम्मान गर्न पाउँदा खुसी छौं’, एनसेलकी कर्पोरेट कम्युनिकेसन एन्ड सीएसआर हेड विशाखालक्ष्मी खड्काले भनिन्, ‘एनपीसीसँगको सहकार्यमा हामी राष्ट्रिय पारा खेलाडीको प्रेरणा बनेर हौसला प्रदान गर्दै बलियो साथ दिन प्रतिबद्ध छौं।’
पलेशाले ऐतिहासिक पदक जितेपछि एनसेलले नगद पुरस्कारसहित उनलाई र अन्य सहभागी पारा खेलाडी र प्रशिक्षकलाई सम्मान गर्ने घोषणा गरेको थियो। एनसेलले गत वर्ष देखि आफ्नो सेवा सञ्चालनको १८औं वार्षिकोत्सवको अवसरमा आफ्नो सीएसआर अन्तर्गत एनपीसीसँग सहकार्यको घोषणा गरेको थियो।
