काठमाडौं। स्थानीय सरकारले सामाजिक तथा आर्थिक रुपान्तरण गर्न पुँजीगत खर्च वृद्धि र का साथै बेरुजु न्यूनीकरण गर्नुपर्नेमा जोड दिइएको छ।
स्थानीय तह, प्रदेश र संघीय कार्यालयबाट गत आर्थिक वर्षमा सञ्चालित कार्यक्रम तथा आयोजनाबारे अनुभव साटासाट गर्न जिल्ला समन्वय समिति काठमाडौंद्वारा आयोजित कार्यक्रममा सहभागीले बेरुजु सुशासनमा बाधक रहेको र विनियोजित पुँजी खर्च वृद्धि गर्न स्थानीय सरकारले थप क्रियाशीलता देखाउनुपर्ने बताएका हुन्।
छलफलमा सामाजिक तथा आर्थिक रुपान्तरण गर्न बढ्दै गएको बेरुजु न्यूनीकरण गर्नुपर्ने धारण उनीहरुले व्यक्त गरे। काठमाडौंका स्थानीय तहले आफ्नो क्षेत्राधिकारको उचित प्रयोग गरी नागरिकमैत्री सेवा प्रवाहमा केन्द्रित हुनुपर्ने सहभागीले सुझाव दिए।
काठमाडौंका महानगर र अन्य १० नगरपालिकाले एक वर्षभित्र गरेका कार्ययोजना, बजेट विनियोजन, पूर्वाधार विकास, निर्माण, सामाजिक विकास, खर्चको अवस्था, बेरुजुको अवस्थाबारे समीक्षा गरिएको हो।
चन्द्रागिरि नगर प्रमुख घनश्याम गिरी, बूढानीलकण्ठ नगर प्रमुख मिठाराम अधिकारीलगायत प्रशासकीय अधिकृतले स्थानीय तहमा बजेट र कार्ययोजनाबारे जानकारी दिँदै आगामी दिनमा स्थानीय अधिकार थप बलियो बनाउन जनप्रतिनिधि र कर्मचारीको एकापसमा सहकार्य र समन्वयको खाँचो औंल्याए।
काठमाडौंका जिल्ला समन्वय अधिकारी लक्ष्मणविक्रम थापाले स्थानीय तहको पूर्वाधार विकास तथा निर्माणमा सम्बन्धित जिल्लाको भूमिका र जिम्मेवारी सशक्त बनाउन आवश्यक रहेको बताउँदै त्यसका लागि समितिलाई थप अधिकार र सुविधासम्पन्न बनाउन आवश्यक रहेको विचार व्यक्त गरे।
उक्त अवसरमा काठमाडौं महानगर तथा अन्य नगरपालिकाको कार्यप्रगतिका साथै सांस्कृतिक, सामाजिक पक्षबारे प्रस्तुतीकरण गरिएको थियो।
