काठमाडौं । नेपाल प्रहरीका पूर्वनायब महानिरीक्षक (डीआईजी) रमेश खरेलले एन्टी करप्सन नेटवर्कका नाममा साउन २९ मा परिवारका सदस्यसहित आफूलाई भ्रष्टाचारी करार गर्दै छानबिनका लागि अख्तियार दुरुपयोग अनुसन्धान आयोगमा दिएको उजुरी कपोलकल्पित रहेको विद्युत् प्राधिकरणका कार्यकारी निर्देशक कुलमान घिसिङले दाबी गरेका छन्।
खरेलले मंगलबार सामाजिक सञ्जालमार्फत आफूविरुद्ध अख्तियारमा भ्रष्टाचार छानबिन हुनुपर्ने मागसहित निवेदन दिएको विवरण र सोही आधारमा विभिन्न सञ्चार माध्यमबाट सम्प्रेषित समाचारप्रति घिसिङले बुधबार विज्ञप्ति निकाले असहमति व्यक्त गरेका हुन्।
‘निज खरेलबाट मेराविरुद्ध कुनै एक टेलिभिजनमार्फत निहित स्वार्थसहित गलत तथा भ्रामक सूचनाको प्रयोगमार्फत कार्यक्रम उत्पादन गरी पटक–पटक सम्प्रेषण भइरहेको थियो। पत्रकारिताका सर्वमान्य सिद्धान्त, मूल्यमान्यता र आचारसंहिताको ठाडो उल्लंघन तथा सञ्चार माध्यम दुरुपयोग उनीबाट मेरो र मेरो परिवारका सदस्य (मुख्य रुपमा दाइ र भाइ) को चरित्र हत्या, मानप्रतिष्ठा र छविमा आघात पुर्याउने उद्देश्यले कसैको उक्साहटमा मेराविरुद्धमा प्रचार भइरहेको थियो र छ’, घिसिङले विज्ञप्तिमा भनेका छन्।
स्वच्छ र यथार्थ समाचार वा टिप्पणी शिष्ट र मर्यादित भाषामा प्रकाशित गर्नु सञ्चार क्षेत्रको दायित्व भए पनि खरेलबाट आफूविरुद्ध आफैं न्यायिक निकायजस्तो बनी दोषी करार गर्नु निन्दनीय रहेको उनले औंल्याएका छन्।
‘सार्वजनिक पदधारण गरेका हरेक व्यक्तिका काम–कारबाही सार्वजनिक चासोका विषय हुन्छन् र त्यस्ता व्यक्तिलाई जनताप्रति उत्तरदायी र जवाफदेही बनाउन उनीहरु जहिले पनि निगरानीमा हुन्छन्। आमजनताले सम्बन्धित निकायमा उजुरी गर्न पाउने हक सम्बन्धमा म अनविज्ञ छैन’, घिसिङले भनेका छन्, ‘उजुरी दर्ता गर्नासाथ त्यसलाई सामाजिक सञ्जालमार्फत सार्वजनिक गर्नुले निज खरेलबाट उक्त उजुरी सार्वजनिक खपत र आफू चर्चामा आउनलाई मात्र गरेको मेरो ठम्याइ छ।’
निष्ठापूर्ण जिम्मेवारी पूरा गरिरहेको व्यक्तिलाई हतोत्साहित बनाउन सुनियोजित रुपमा खरेलबाट निहित स्वार्थले यस्ता काम भइरहेको उनले दाबी गरेका छन्।
‘अंशबन्डा गरी लामो समयदेखि मबाट छुट्टै बसिरहेका दाइभाइले नेपालको संविधान र ऐन कानुनले दिएको हकाधिकार प्रयोग गरी स्वतन्त्र रुपमा राज्यलाई तिर्नुपर्ने कर तिरी आफ्नो व्यापार, व्यवसाय इमानदारीपूर्वक सञ्चालन गरिरहेका छन्। मैले आफ्नो पदीय दुरुपयोग गरी मेरा दाइ र भाइले सञ्चालन गरिरहेको व्यापार व्यवसायलाई फाइदा पुग्ने कुनै पनि कार्य नगरेको प्रस्ट पार्न चाहान्छु। यदि मैलै त्यस्तो गरेको पाइए राज्यका निकायले छानबिन गर्नेछन्’, उनले भनेका छन्।
घिसिङले निकालेको विज्ञप्तिको बाँकी भाग
नेपालको संविधान तथा प्रचलित कानूनको परिधिभित्र रहेर निष्ठासाथ दिनरात एवम् आफ्नो व्यक्तिगत जीवनलाईसमेत प्रवाह नगरी अहोरात्र खटी नेपाल सरकारले दिइएको जिम्मेवारी निष्ठापूर्वक प्रतिबद्धताकासाथ पूरा गरिरहेको छु। नेपाली जनतालाई भरपर्दो, गुणस्तरीय, पर्याप्त र सुरक्षित विद्युत आपूर्ति उपलब्ध गराउने मुख्य उद्देश्यलाई इमान्दारीपूर्वक जवाफदेही बनी आफ्नो जिम्मेवारी पूरा गरिरहेको व्यक्तिलाई बद्नाम गराउने दुराशयकासाथ लगाइएका आरोपहरुको खण्डन गर्दछु। यस्ता आरोपको भ्रममा नर्पन सबैलाई अनुरोध गर्दछु।
प्राधिकरणले हासिल गरेका प्रगति एवम् उपलब्धीबाट अत्तालिएको केही स्वार्थ समूह (जो पहिलेबाटै सक्रिय थियो) र विद्युत महसुल बक्यौता रकम असुल गर्न चालिएका कदमबाट आत्तिएका केही व्यक्ति तथा संस्था अहिले मलाई कमजोर बनाउन र मनोबल गिराउन मेरा विरुद्धमा सुनियोजित रुपमा लागिरहेका छन्। प्रचलित सार्वजनिक खरिद कानून बमोजिम गरिएका खरिद सम्झौताहरु, विद्युत खरिद बिक्री सम्झौता (पिपिए) र अन्य कतिपय असान्दर्भिक विषयहरुलाई उचाल्नुले पनि यही कुरालाई पुष्टि गर्दछ।
नेपाली जनतालाई भरपर्दो, गुणस्तरीय, पर्याप्त र सुरक्षित विद्युत आपूर्ति गर्ने, संस्थालाई वित्तीय रुपमा सबल एवम् सक्षम बनाउने, विद्युत, उत्पादन, प्रसारण र वितरणतर्फका पूर्वाधार संरचनाहरुको विकास तथा विस्तार गरी ऊर्जामा मुलुकलाई आत्मनिर्भर बनाउँदै छिमेकी देशहरुसँगको विद्युत व्यापार विस्तार गर्नेबाहेक अन्य मेरा कुनै व्यक्तिगत र नाजायज स्वार्थ नरहेको प्रष्ट पार्दछु।
नेपाल विद्युत प्राधिकरणका हरेक कामकारबाहीहरु पारदर्शी रुपमा भइरहेका छन्। र, अझै पारदर्शी रुपमा अगाडि बढाइने छ। ऊर्जा क्षेत्रका योजनाहरु कार्यान्वयन गर्ने निकायको कार्यकारी प्रमुखको रुपमा आफ्नो भूमिका अझै निष्ठापूर्वक, इमान्दार भएर पूरा गर्ने यसै विज्ञप्तिमार्फत प्रतिबद्धता जनाउँदछु।
