काठमाडौं । प्रधानमन्त्री केपी शर्मा ओलीले पूर्वाधार विकासको क्रमसँगै उत्पादन र रोजगारी वृद्धितर्फ ध्यान केन्द्रित गर्न लुम्बिनी प्रदेश सरकारलाई आग्रह गरेका छन्।
लुम्बिनीका मुख्यमन्त्री चेतनारायण आचार्यसहित मन्त्रीसँग आइतबार प्रधानमन्त्री निवास बालुवाटारमा भएको छलफलमा प्रधानमन्त्री ओलीले उपयुक्त माटोमा उन्नत जातका बाली लगाएर कृषिलाई औद्योगिकीकरण गर्दै त्यसको बजार विस्तार गर्नसमेत सुझाव दिए।
'हिले समग्र अर्थतन्त्र ओरालो लागेको छ। भवन, कार्यालयलगायत संरचनामा खर्च गरेर तत्काल उत्पादन वृद्धि हुन सक्दैन। हामीसँग ऊर्बर धर्ती, पानी र हावापानी छ। मेहनत गरेर उत्पादन र रोजगारी बढाउन सकिने धेरै आधार छन्। यस्ता काममा हाम्रा राजनीतिक दलका संगठन र कार्यकर्ता पनि लाग्नुपर्छ। तिनीहरूले जनतासँग नङ र मासुको सम्बन्ध बनाउनुपर्छ। हामीहरू नियुक्तिमा को जाने/नजाने खालको साना विषयमा अल्झनु हुँदैन। मुख्य कुरा, देशको विद्यमान समस्या समाधान कसरी गर्ने भन्नेमा हाम्रो ध्यान जानुपर्छ,' प्रधानमन्त्री ओलीले भने।
उनले अशुद्ध र विषादीयुक्त खाद्य पदार्थ/तरकारी आयात र निर्यात नगर्न ध्यानाकर्षण गराएका छन्।
अहिलेको समीकरण र सरकार मुलुकको विशेष अवस्थाका कारण बनेको उल्लेख गर्दै उनले एमाले र कांग्रेस मिल्दा पनि देश बनाउन नसकिए कस्ले बनाउँछ भन्ने प्रश्न गरे। प्रधानमन्त्री ओलीले हाल घाटा बजेटमा सरकारहरू सञ्चालन भएकाले आफूहरूले छोडेर जाँदा यस्तो अवस्थाको अन्त्य गराउने गरी काम गर्न आग्रह गरे।
प्रधानमन्त्री ओलीले सरकार सञ्चालन गर्दा कसले कति भाग लिने भन्ने खालको विवाद नगरी सहमति/सहकार्य र जनताका लागि परिणाम दिने मुख्य विषयलाई ध्यान दिन आग्रह गरे।
मुख्यमन्त्री आचार्यले प्रदेशको राजधानी रुपन्देहीबाट दाङ सार्न बजेटको प्रबन्ध र समग्र पूर्वाधार विकासमा केन्द्र सरकारको सहयोगको अपेक्षा गरेका थिए।
छलफलमा उपप्रधानमन्त्री एवं अर्थमन्त्री विष्णुप्रसाद पौडेल, नेकपा एमालेका महासचिव शंकर पोखरेललगायत सहभागी थिए।
