काठमाडौं । उपप्रधान एवं शहरी विकास मन्त्री प्रकाशमान सिंहले राजनीतिक परिवर्तनसँगै आर्थिक, सामाजिक परिवर्तनमा युवाको भूमिका महत्त्वपूर्ण हुने बताएका छन्। अन्तर्राष्ट्रिय युवा दिवसका अवसरमा युवा संस्था सञ्जाल (आयोन)ले आयोजना गरेको कार्यक्रममा बोल्दै उनले यस्तो बताएका हुन्।
उपप्रधानमन्त्री सिंहले अहिलेको अवस्थामा सुधार ल्याउन अझ राम्रो गर्नुपर्ने भन्दै त्यसका लागि सबैलाई लाग्न आग्रह गरे। आरोप-प्रत्यारोपले मात्रै देशको अवस्था नसुध्रने उनको भनाई छ।
उनले देशमा युवा बेरोजगारीको समस्या रहेको बताउँदै त्यसलाई समाधान गर्न सबैले मिलेर काम गर्नुपर्ने बताए। अहिलेको सरकार देशलाई आर्थिक समृद्धिमा लैजाने सहमतिको जगमा बनेको बताउँदै नेता सिंहले युवाले भोगिरहेको समस्या समाधानमा सरकार गम्भीर रहेको प्रस्ट पारे।
‘अधिकार प्राप्त गर्न आवाज उठाउँ। तर, आफ्नो जिम्मेवारी र कर्तव्यलाई पनि ध्यान दिऔं,’ मन्त्री सिंहले भने, ‘अहिलेको अवस्थाबाट पार गर्नका लागि संवेदनशिल भएर तथ्यलाई केलाएर मात्र राम्रो अवस्थामा जानसक्छौं। आर्थिक,सामाजिक परिवर्तन र पद्धतिमा देशलाई अघि बढाउन युवाको भूमिका महत्त्वपूर्ण रहन्छ।’
अहिले केही भएन भन्ने भाष्य बनाएर दुस्प्रचार गरिएकोतर्फ युवालाई सचेत रहन आग्रह गर्दै उनले २०४६ र २०६२/६३ को परिवर्तनपछि आफ्नो गाउँको अवस्थो, बाटोघाटो, स्वास्थ्य र शिक्षाको अवस्थाबारे आफ्नै अभिभावकसँग बुझ्न आग्रह गरे। अहिलेभन्दा अझ राम्रो गर्नका लागि नै अहिले संसद्का दुई ठूला दल मिलेर सरकार बनेको उनले बताए।
उपप्रधानमन्त्री सिंहले अहिले सामाजिक सञ्जालमा आउने खबर सबै सत्य नहुने भन्दै त्यसको तथ्य केलाएर मात्रै धारणा बनाउन युवाहरूसँग आग्रह गरे। ‘आर्टिसिसियल इन्टेसलिजेन्सको जमाना आइसकेको बेलामा डिजिटलाइजेसनमा जानुहुन्न, खराबै छ भन्ने होइन। तर, राम्रो पक्ष र सोच्नुपर्ने कुरामा समयमै ध्यान दिनु राम्रो हुन्छ,’ उनले भने।
