काठमाडौं। उद्योग वाणिज्य तथा आपूर्तिमन्त्री दामोदर भण्डारीले निर्यातजन्य वस्तु साना तथा मझौला उद्योग धेरै संख्यामा रहेकाले त्यस्ता उद्योेगको प्रवर्द्धनमा सरकार हरतरहले लागेको बताएका छन्।
नेपाल घरेलु तथा साना उद्योग महासंघ पदाधिकारीसँग भएको छलफलमा उनले यस्तो बताएका हुन्।
उद्योग मन्त्रालय र महासंघ पदाधिकारीबीच निरन्तर समन्वय र सहकार्य भए मुलुकको औद्योगिक विकासमा सहयोग पुग्ने उनको धारणा छ।
आत्मनिर्भर अर्थतन्त्रको बाटो भनेकै लघु, घरेलु, साना तथा मझौला उद्योग रहेको बताउँदै मन्त्री भण्डारीले भने, ‘घरेलु तथा साना उद्योग भनेको तान बुन्ने मात्रै होइन, कृषि, उद्योग पनि हो। विभिन्न उत्पादनमूलक उत्पादन, जडीबुटी संकलन पनि हो। यी क्षेत्रलाई अझ समृद्ध बनाउनुहोस् । त्यसका लागि सहजीकरण गर्न मन्त्रालय तयार छ।’
उद्योगी व्यवसायीलाई प्रोत्साहित गर्ने र उद्योग व्यवसायको विकासका लागि सरकार प्रतिबद्ध रहेको उद्योगमन्त्रीले बताए।
उद्योग, वाणिज्य तथा आपूर्ति मन्त्रालयका सचिव कृष्णबहादुर राउतले साना उद्योगीहरुकै लागि ‘स्टार्टअप’ कार्यक्रम ल्याइएको भन्दै आगामी दिनमा पनि यस्ता कार्यक्रमलाई निरन्तरता दिइने उनले जानकारी दिए। उद्योग क्षेत्रको विकासका लागि लघु, घरेलु तथा साना उद्योगीको भूमिकाको सराहना गर्दै उनले मन्त्रालयले उद्योगको विकासका लागि वार्षिक पुस्तिका नै तयार गरेर अगाडि बढेकाले सोहीअनुरुप साथ दिन महासंघलाई आग्रह गरे।
महासंघ अध्यक्ष उमेशप्रसाद सिंहले संघीय संरचनाअनुरुप स्थानीय, प्रदेश र केन्द्रीय सरकारको कार्यक्षेत्र र जिम्मेवारी उल्लेख गरिएको औद्योगिक नीति तर्जुृमा गर्न आवश्यक भएको बताए।
उक्त अवसरमा महासंघका पूर्वअध्यक्षहरु वासु गिरी, लता प्याकुरेल, श्याम गिरी, वरिष्ठ उपाध्यक्ष सूर्य कँडेल, उपाध्यक्षहरु शोभा गुरुङ र सत्यनारायण प्रजापति, महासंघ बागमती प्रदेशका उपाध्यक्ष रामकृष्ण खड्कीलगायतको सहभागिता थियो।
