बागलुङ। कुनै समय निर्माण क्षेत्रमा ज्याला मजदुरी गर्ने बागलुङ नगरपालिका–९ तित्याङका पदम खत्री यतिबेला तरकारीखेतीमा रमाएका छन्। तरकारी खेतीबाटै स्वरोजगार बनेका उनी जिल्लामा उत्कृष्ट किसानका रुपमा सम्मानसमेत पाइसके।
कृषि ज्ञान केन्द्र बागलुङले खत्रीलाई गत धान दिवसमा उत्कृष्ट किसानका रुपमा नगदसहित सम्मान गरेको थियो। घर निर्माणलगायतका काममा मजदुरी गर्ने उनी १५ वर्षदेखि व्यावसायिक कृषिमा सक्रिय छन्। २०६६ मा एउटा प्लाष्टिक टनेलबाट तरकारी खेती सुरु गरेका खत्री यतिबेला जिल्लाकै सफल किसानका रुपमा परिचित छन्।
उनले अहिले १८ रोपनी जग्गामा तरकारी खेती गरिरहेका छन्। उनीसँग फर्ममा आठ वटा साना र ठूला प्लाष्टिक टनेल छन्।
अधिकांश दौंतरीहरु पैसा कमाउन विदेश पलायन भए पनि खत्री भने तरकारी खेतीमै सक्रिय छन्। तरकारीखेतीबाट नाम र दाम दुवै हुन थालेपछि विदेश जाने योजना कहिल्यै नबनेको उनले सुनाए।
उनले तरकारी खेतीबाटै वार्षिक १० देखि १२ लाखसम्म आम्दानी गर्दै आएका छन्। उनले हालसम्म एक दर्जनभन्दा बढी संस्थाबाट प्रोत्साहनस्वरुप पुरस्कार प्राप्त गरिसकेका छन्।
‘एक रोपनी जग्गाबाट सुरु भएको तरकारीखेती अहिले १८ रोपनीमा पुगेको छ। अहिले दाम मात्रै हैन नामसमेत कमाउन थालेको छु, पहिला वडामा मात्रै कृषक भनेर चिन्थे अहिले जिल्लाभर कृषकको परिचय फेरिएको छ’, उनले भने, ‘पाँच रोपनी आफ्नै र अन्य जग्गा भाडामा लिएर तरकारी उत्पादन गर्दै आएको छु।’
अहिले खत्रीको टनेलमा टमाटर, सिमी, काक्रो, काउली, बन्दालगायतका तरकारी उत्पादन भइरहेका छन्। खत्रीले बेमौसमी तरकारी तथा खुला जग्गामा मौसमी तरकारीखेती गरिरहेका छन्।
आठ वटा प्लाष्टिक टनेलमध्ये दुई वटा हाइटेक टनेल र अन्य परम्परागत टनेल रहेको बताउँदै खत्रीले नगरपालिकाको तरकारी खेती प्रवर्द्धन कार्यक्रमअन्तर्गत आधुनिक टर्नेल निर्माण भइरहको जानकारी दिए।
खत्री एग्रो फार्ममा हालसम्म १२ लाख लगानी गरिसक्नुभएको छ । उनले कृषि ज्ञान केन्द्रबाट प्लाष्टिक टनेल निर्माण र बिउबिजनमा सहयोग प्राप्त भइरहेको बताए। उनले तरकारी खेतीसँगै बोइलर र भेडापालन पनि गरेका छन् एक जनालाई प्रत्यक्ष रोजगारी समेत दिएका छन्।–रासस
