बागलुङ। कालीगण्डकी करिडोर तीन दिनदेखि अवरुद्ध भएको छ। असार २६ को भारी वर्षाका कारण ठाउँठाउँमा पहिरो खसेपछि करिडोर अवरुद्ध भएको हो।
करिडोरको बागलुङ नगरपालिका–१० दब्ल्याङमा सडकको बीच भागबाटै पहिरोले भासिएको छ। सडक अवरुद्ध हुँदा दक्षिण बागलुङसँग सीधा यातायात विच्छेद भएको छ। असार २१ मा खसेको पहिरोले सडक भासिएपछि पाँच दिनसम्म अवरुद्ध बनेको करिडोर असार २६ मा करिब तीन घन्टा सञ्चालनमा आएको थियो।
सडक मर्मतका लागि मेसिन र कामदार खटाए पनि वर्षाका कारण काम गर्न समस्या भएको जिल्ला प्रहरी कार्यालय बागलुङका प्रहरी निरीक्षक वसन्त भुजेलले जानकारी दिए। अवरुद्ध सडक खुलाउन प्रयास गरिए पनि वर्षाले हालसम्म सञ्चालनमा ल्याउन नसकिएको उनको भनाइ छ।
करिडोरबाहेक जिल्लाका अन्य सडक सञ्चालनमा रहेको प्रहरी निरीक्षक भुजेल बताउँछन्। उनले भने, ‘पानी पर्नेबित्तिकै पहिरो खस्छ, पहिराले बगाएको पर्खाल निर्माण गर्न बाँकी छ।’
करिडोर अवरुद्ध सडक सञ्चालनमा नआउँदा दक्षिण बागलुङसँग सीधा यातायात सम्पर्क हुन सकेको छैन। यातायात सञ्चालन नहुँदा यात्रुले सास्ती खेपिरहेका छन्। किसानले उत्पादन गरेको दूध सहज रुपमा बजारमा ल्याउन सकेका छैनन्।
बागलुङको जैमिनी क्षेत्रबाट मात्रै दैनिक चार सय लिटर दूध बागलुङ बजारमा ल्याउने भए पनि सडक अवरुद्ध हुँदा पर्वतको कुश्मा हुँदै आउनुपर्ने अवस्था रहेको जैमिनी नगरपालिकाका उपप्रमुख हरिहर शर्माले बताए। सडक अवरुद्ध हुँदा दूध ढुवानीमा समस्या परेको जैमिनी नगरपालिका–२ का राजन सापकोटाको भनाइ छ।
उनले सडक सञ्चालन हुँदा दैनिक सात सयमा बागलुङ बजारमा दूध ल्याउने गरेको सुनाउँदै अहिले केबलकारको प्रयोग गर्दै दुई हजार तिर्नुपरेको गुनासो पोखे। पहिरोले लामो समयसम्म सडक बन्द हुँदा सबैभन्दा बढी मारमा किसान परेका सापकोटाले सुनाए।–रासस
