सेयर

धितोपत्र बोर्ड अध्यक्ष नियुक्ति प्रक्रिया रद्द नगर्न सर्वोच्चको अल्पकालीन अन्तरिम आदेश

क्यापिटल नेपालमंगलबार, असार १८, २०८१

काठमाडौं–सर्वोच्च अदालतले नेपाल धितोपत्र बोर्डको अध्यक्ष नियुक्ति प्रक्रिया रद्द नगर्न अल्पकालीन अन्तरिम आदेश दिएको छ।

मंगलबार प्रधानमन्त्री कार्यालय, अर्थ मन्त्रालय, महान्यायाधिवक्ता कार्यालय, अध्यक्ष नियुक्ति प्रयोजनका लागि गठित सिफारिस समिति लगायतलाई विपक्षी बनाइएको रिटमाथि सर्वोच्चका न्यायाधीश अब्दुल अजिज मुसलमानको एकल इजलासले बोर्ड अध्यक्ष नियुक्ति प्रक्रिया रद्द गर्न नगर्न अल्पकालीन अन्तरिम आदेश दिएको हो।

सिफारिस समितिले बाेर्ड अध्यक्षका लागि सर्टलिस्टमा परेका ५ मध्ये ३ जना अन्तर्वार्तामा अनुपस्थित भएको बताएर प्रक्रिया रद्द गर्ने निर्णय गरेकाे थियाे। त्यसविरुद्ध सर्टलिस्टमा परेका सन्तोषनारायण श्रेष्ठले समितिको निर्णय खारेजी माग गर्दै सर्वोच्चमा रिट दायर गरेका थिए।

सर्वोच्चले कारण देखाऊ आदेशसँगै सरकार र अन्य विपक्षीसँग लिखित जवाफ पनि माग गरेको अदालतका सूचना अधिकारी गोविन्दप्रसाद घिमिरेले बताए।
२०८० माघ ४ मा गठित सिफारिस समितिले बोर्ड अध्यक्षमा आवेदन मागपछि १९ जनाले आवेदन दिएका थिए। समितिले तीमध्ये पाँचको नाम सर्टलिस्ट गरी कार्ययोजना प्रस्तुतीकरण र अन्तर्वार्ताका लागि बोलाएको थियो। सर्टलिस्टमा परेका पाँचमध्ये सन्तोषनारायण र बोर्डका कार्यकारी निर्देशक मुक्तिनाथ श्रेष्ठले अन्तर्वार्ता दिएका थिए।

तर, बोर्डका अर्का कार्यकारी निर्देशक डा. नवराज अधिकारी, बिमा प्राधिकरणका पूर्वअध्यक्ष चिरञ्जीवी चापागाईं र नेपाल स्टक एक्सचेन्ज (नेप्से) का प्रमुख कार्यकारी अधिकृत कृष्णबहादुर कार्की भने अन्तर्वातामै गएनन्।

बोर्ड ऐनमा अध्यक्ष नियुक्त गर्दा सर्टलिस्ट ३ जनामध्ये एक जनाको छनोट गर्नुपर्ने व्यवस्था छ। दुई जना मात्रै अन्तर्वार्तामा सहभागी भएपछि सरकारले महान्यायाधिवक्ता कार्यालयसँग रायसुझाव मागेको थियो। महान्यायाधिवक्ता कार्यालयले बोर्ड अध्यक्ष नियुक्तिका लागि सर्टलिस्टमा परेका तीन जना उम्मेदवार हुनैपर्ने र तीमध्ये एक जना छनोट गर्नुपर्ने कानुनी प्रावधान रहेकोतर्फ ध्यानाकर्षण गराएको थियो।

त्यसपछि सरकारले असार १४ मा बोर्ड अध्यक्ष नियुक्ति प्रक्रिया रद्द गरिएको सूचना जारी गरेको थियाे।