काठमाडौं। उद्योग, वाणिज्य तथा आपूर्तिमन्त्री दामोदर भण्डारीले तीन मुख्य दलका प्रमुख सचेतकसँग छलफल गरेका छन्।
लगानी सहजीकरणसम्बन्धी केही नेपाल ऐनलाई संशोधन गर्ने विधेयक, २०८१ मा प्राप्त संशोधनबारे उनले प्रमुख सचेतकसँग छलफल गरेका हुन्।
मन्त्रालयमा आज भएको छलफलमा कांग्रेसका प्रमुख सचेतक रमेश लेखक, एमालेका महेश बर्तौला र नेकपा माओवादी केन्द्रका हितराज पाण्डेसँग मन्त्री भण्डारीले छलफल गरेका हुन्।
उनले लगानी सहजीकरणसम्बन्धी कानुन लचकताका साथ संसद्बाट पास गर्न प्रमुख सचेतकसँग आग्रह गरे। लगानीमैत्री वातावरण बनाउन सबै राजनीतिक दलको सहयोग आवश्यक रहेकाले सहयोगका लागि मन्त्री भण्डारीले उनीहरुलाई आग्रह गरे।
कांग्रेसका प्रमुख सचेतक लेखकले पार्टीका संशोधनकर्ता सांसदसँग छलफल गरेर सहजीकरणको वातावरण बनाउने प्रतिबद्धता जनाए।
उनले लगानी सहजीकरणका लागि केही बुँदा संशोधन गर्न आवश्य रहेको बताए।
एमालेका प्रमुख सचेतक बर्तौलाले उद्योग कलकारखाना स्थापनाको विषय सबै दलको साझा एजेन्डा भएकाले सत्तापक्ष र विपक्ष नभनीकन दलिय स्वार्थभन्दा माथि उठेर कानुन निर्माणमा जुट्नुपर्ने बताए। केही जटिल बुँदामा संशोधन आवश्यक रहेको उनको भनाइ थियो।
माओवादी केन्द्रका प्रमुख सचेतक पाण्डेले संशोधन प्रस्ताव राख्नु उचित भए पनि समय अभावका कारण नगरी नहुने विषय मात्र संशोधन गरेर अगाडि बढ्नुपर्ने बताए।
छलफलमा वनसँग सम्बद्ध निकुञ्ज र मध्यवर्ती क्षेत्र तथा जग्गा हदबन्दीका विषयमा संशोधन जरुरी रहेको औंल्याइएको थियो। छलफलमा सरोकारवाला मन्त्रालयका सचिवसमेत सहभागी थिए।
