काठमाडौं । विशेष अदालत काठमाडौंले महोत्तरीको एक सरकारी वन फडानीमा तत्कालीन वन अधिकृतसहित ६ जनालाई दोषी ठहर गर्दै १८ जनालाई सफाइ दिएको छ। विशेष अदालतले बुधबार वन फडानी गर्दै भ्रष्टाचार गर्नेमा ६ जनाको मात्र संलग्नता देखिएको र अन्य प्रतिवादीको अभियोग दाबी नपुग्ने भन्दै यस्तो फैसला सुनाएको हो।
विशेष अदालतका अध्यक्ष टेकनारायण कुँवर, तेजनारायण सिंह राई र मुरारीबाबु श्रेष्ठको इजलासले यस्तो फैसला सुनाएको हो। विशेषले लक्ष्मणप्रसाद यादव, राम दरस राउत, शेरबहादुर राउत, कृष्णप्रसाद गौतम, लीलामणि आचार्य र सन्दीप नेपालीलाई दोषी ठहर गरेको छ।
उनीहरू हकमा सजाय निर्धारण भने असार २५ गते हुने विशेष अदालतको फैसलामा उल्लेख छ। विशेषले दुई रूपमा अभियोगमा दोषी ठहर गरेको छ। विशेषले लक्ष्मणप्रसाद, रामदास र शेरबहादुरलाई ११ लाख ९६ हजार ६ सय बराबरको रुख कटानीमा भ्रष्टाचार गरेको ठहर गरेको छ।
त्यस्तै प्रतिवादी कृष्णप्रसाद गौतम, लीलामणि र सन्दीपले सामुदायिक वनको रुख व्यक्तिगत भएको भनी सरकारी सम्पत्तिमा हानी नोक्सानी पुर्याएको विशेषको फैसलामा उल्लेख छ।
अख्तियार दुरुपयोग अनुसन्धान आयोगले डिभिजन वन अधिकृत हेमन्त प्रसाद साहसहित २४ जनाविरुद्ध भ्रष्टाचार मुद्दा दायर गरेको थियो। उक्त अभियोगमा साहले भने सफाइ पाएका छन्।
उनीहरूले ११ लाख ९६ हजार ६ सय ९५ रुपैयाँ बराबरको सरकारी सम्पत्ति हानी नोक्सानी गरेको आरोप अख्तियारको आरोप छ। अख्तियारले डिभिजन वन कार्यालय जलेश्वर, महोत्तरीका तत्कालीन सहायक वन अधिकृत बचेन ठाकुरविरुद्ध पनि भ्रष्टाचार मुद्दा दायर गरेकोमा उनले सफाइ पाएका छन्।
यसैगरी रम्तेल डाँडा सामुदायिक वन उपभोक्ता समितिका तत्कालीन अध्यक्ष शेर बहादुर राउत, उपाध्यक्ष उमादेवी बुढाथोकी, कोषाध्यक्ष प्रेम बहादुर थापा, सचिव धन कुमारी मगर भनिने धन कुमारी, सदस्यहरू उर्मिला थापा मगर र पूर्णबहादुर सुस्लिङ्ग, महोत्तरी, बर्दिबास नगरपालिका–१ बस्ने जग्गाधनीद्वय लीलामणि आचार्य र कृष्ण प्रसाद गौतम, रम्तेल डाँडा सामुदायिक वनका उपभोक्ता एम बहादुर थापा मगर र नन्दमाया खनाल भनिने नन्दमाया क्षेत्री र सिन्धुलीको सुनकोसी गाउँपालिका–४ का रुख कटान गर्ने ठेकेदार सन्दीप नेपालीविरुद्ध पनि अख्तियारले ११ लाख ९६ हजार ६ सय ९५ रुपैयाँ बिगो माग दाबी गरेको थियो।
यसैगरी सब–डिभिजन वन कार्यालय बर्दिबास, महोत्तरीका तत्कालीन सहायक वन अधिकृत लक्ष्मण प्रसाद यादव, फरेष्टर सन्तोष कुमार साह, वनरक्षकहरू राज किशोर झा, अजय कुमार यादव, राकेश कुमार यादव, नारायण ढुंगेल र दिलीप महतोविरुद्ध पनि भ्रष्टाचार आरोपमा मुद्दा दायर गरेको थियो।
नापी कार्यालय, बर्दिबास महोत्तरीका तत्कालीन अमिन राम दरश राउत, मालपोत कार्यालय बर्दिबास, महोत्तरीका तत्कालीन नायब सुब्बा ओम प्रकाश खड्का र बर्दिबास नगरपालिका-१ का तत्कालीन वडा सदस्य शान्ता देवी श्रेष्ठ, बर्दिबास नगरपालिका-१ का तत्कालीन वडाध्यक्ष चूडामणि पोखरेल र रम्तेल डाँडा सामुदायिक वन उपभोक्ता समितिउपर समेत बिगो माग दाबी गरेको थियो । बिगो र कैद भनेपछि मात्र निर्धारण हुनेछ।
