गोरखा। पूर्वप्रधानमन्त्री एवं नेपाल (समाजवादी पार्टी)का अध्यक्ष डा बाबुराम भट्टराईले बूढीगण्डकी जलविद्युत् आयोजनालाई बहुउद्देश्यीय आयोजनाकै रुपमा अगाडि बढाउनुपर्ने बताएका छन्।
शनिबार गोरखामा आयोजित पत्रकार भेटमा उनले आयोजनाको विद्यमान अवस्था जारी रहे बूढीगण्डकीको काम अलपत्र पर्न सक्ने खतरा औंल्याएका हुन्।
उनले भने, ‘नेपाल विद्युत् प्राधिकरणको सहायक कम्पनीबाट बनाउन खोजिए बूढीगण्डकी बहुउद्देश्यीय आयोजनाका रुपमा बन्नै सक्दैन। प्राधिकरणको सहायक कम्पनीबाट बनाउन जुन बहुउद्देश्यीय आयोजनाको परिकल्पना गरेका छौँ, त्यो सम्भव छैन। यो विषयमा गोरखालीले पनि आवाज उठाउनुपर्छ।’
बूढीगण्डकीलाई बहुउद्देश्यीय आयोजनाका रुपमा अगाडि बढाउन बूढीगण्डकी विकास प्राधिकरण निर्माण गर्नुपर्नेमा उनले जोड दिए। ‘बूढीगण्डकी विकास प्राधिकरण गठन गरेर आयोजना निर्माण अगाडि बढाउन सकियो मात्र यो आयोजना राष्ट्रिय गौरवको रुपमा बन्छ’, पूर्वप्रधानमन्त्री भट्टराईले भने, ‘नत्र हामीले परिकल्पना गरिएअनुसार आयोजना बन्नै सक्दैन।’
उनले वर्तमान सरकारले पनि बूढीगण्डकी आयोजना निर्माणको काम अगाडि बढाउन नचाहेको बताए। ‘मुख्य परियोजना बूढीगण्डकी परियोजना नै अलपत्र बन्दै छ’, पूर्वप्रधानमन्त्री भट्टराईले भने, ‘प्रधानमन्त्री पुष्पकमल दाहाल कुनै न कुनै रुपमा ९ वर्षदेखि सत्तामा हुनुहुन्छ, चाहे आफ्नो नेतृत्वमा होस् वा अरुको नेतृत्वमा। तर, आयोजना पटक्कै अगाडि बढाएको देखिएन।’
गोरखालाई विकास र समृद्धिको मोडलका रुपमा अगाडि बढाउनुपर्ने आफ्नो चाहाना रहे पनि आगामी आर्थिक वर्ष २०८१÷८२ का लागि केन्द्र सरकारले विनियोजन गरेको बजेटबाट उक्त सम्भावना नरहेको उनको भनाइ छ। झट्ट हेर्दा गोरखामा बढी बजेट हालेको प्रचार भए पनि टुक्रे योजना मात्र परेको उनले दाबी गरे।
‘गोरखाको पश्चिम क्षेत्रलाई औद्योगिक क्षेत्रका रुपमा विकास गर्ने र सँगसँगै यहाँको ऐतिहासिक, सांस्कृतिक क्षेत्रलाई जोडेर धार्मिक पर्यटन तथा उत्तरी गोरखालाई साहसिक पर्यटनको जुन बढी सम्भावना छ’, उनले भने, ‘यसलाई मिलाएर एकीकृत पर्यटनको योजना बनाउने प्रस्ताव गरेको भए पनि कुनै सरकारले काम गरेनन्।’–रासस
