काठमाडौं। नेपाल उद्योग वाणिज्य महासंघ अध्यक्ष चन्द्रप्रसाद ढकालले नेपालमा लगानीका लागि विश्वका लगानीकर्तालाई आग्रह गरेका छन्।
स्वीट्जरल्यान्डको जेनेभामा जारी ११२औं अन्तर्राष्ट्रिय श्रम सम्मेलनलाई नेपालको निजी क्षेत्रका तर्फबाट सम्बोधन गर्दै अध्यक्ष ढकालले सुमधुर श्रम सम्बन्ध, नेपाल सरकारले थालेको आर्थिक सुधार एवं भारत र चीनबीचको रणनीतिक बजारका कारण लगानी वातावरण बन्दै गएकाले यसबाट लाभ लिन आग्रह गरे।
नेपालका रोजगारदाता श्रमिक कर्मचारीको सामाजिक सुरक्षाप्रति संवेदनशील रहेका र दुवै पक्षको पहलमा असल श्रम सम्बन्ध विस्तार भइरहेकाले यसलाई दिगो राख्न औद्योगिक विस्तार आवश्यक रहेकामा उनले जोड दिए।
उनले सामाजिक सुरक्षा, लैङ्गिक समानता र दिगो आयआर्जनका थप अवसर सिर्जना गर्न सम्मेलनमा सहभागी रोजगारदातालाई नेपालमा लगानी बढाउन आग्रह गरेको महासंघद्वारा जारी विज्ञप्तिमा उल्लेख छ।
भारतसँग १० हजार मेगावाट विद्युत् खरिद सम्झौता भएको र बंगलादेशसँग पनि यसबारे छलफल भइरहेको बताउँदै अध्यक्ष ढकालले नेपालमा उत्पादित बिजुली बजार सुनिश्चित भएकाले यस क्षेत्रमा लगानीको प्रचुर सम्भावना रहेको धारणा व्यक्त गरे।
यसैगरी भारत र चीनजस्ता धेरै जनसंख्या भएका उदीयमान अर्थतन्त्रमा नागरिकको क्रयशक्ति बढेकाले नेपालका ‘हिल स्टेसन’मा पर्यटकीय पूर्वाधार विस्तारको सम्भावना रहेको पनि उनको भनाइ थियो।
अध्यक्ष ढकालले सूचना प्रविधि, कृषिजन्य उद्योगलगायत उत्पादनमूलक क्षेत्र नेपालमा तुलनात्मक रुपमा बढी लाभका क्षेत्र रहेको विश्वका लगानीकर्तालाई जानकारी गराए।
लगानी सहजीकरणका लागि सरकारले द्विपक्षीय व्यापार सम्झौताको खाका तयार पारेको, लगानी सहज बनाउने कानुनमा सुधार हुँदै गएको र दोहोरो कर हटाउने नीति अंगीकारको योजनामा रहेको पनि सम्मेलनका सहभागीलाई जानकारी गराए।
अध्यक्ष ढकालले अन्तर्राष्ट्रिय श्रम संगठन (आईएलओ) र रोजगारदाताको अन्तर्राष्ट्रिय संगठन (आईओई) का उच्चपदस्थ अधिकारीसँग पनि भेटवार्ता गरेको विज्ञप्तिमा जनाइएको छ।
