काठमाडौं। सुर्खेतको वीरेन्द्रनगरमा रहेको बुलबुले तालमा मोटरबोटको सञ्चालनमा ल्याइएको छ। गत वैशाख १२ देखि परीक्षणका रुपमा सञ्चालन गरिएको मोटरबोटको कर्णाली प्रदेशका मुख्यमन्त्री यमलाल कँडेलले आजदेखि औपचारिक सुरुआत गरेका हुन्।
कार्यक्रममा मुख्यमन्त्री कँडेलले कर्णालीको विकासमा पर्यटन क्षेत्रको भूमिका महत्त्वपूर्ण हुने उल्लेख गर्दै प्रदेश सरकारले मोटरबोट सञ्चालनका लागि सक्दो सहयोग गर्ने प्रतिबद्धता व्यक्त गरे।
उनले भने, ‘प्रदेशको विकासका लागि कृषि क्षेत्रको व्यावसायिकीकरण, घरेलु उद्योग र पर्यटन मुख्य हो। बोटेबोरा कम्पनीले यहाँ मोटरबोट सञ्चालन गरेपछि पर्यटकीय गतिविधि पनि बढेको छ। प्रदेश सरकारले आगामी दिनमा सक्दो सहयोग गर्नेछ।’
उनले प्रदेशमा निजी क्षेत्रको लगानी अझ बढ्नुपर्नेमा जोड दिए। कर्णालीलाई जहिले पनि दुःख र अप्ठ्यारोको पर्यायवाचीका रुपमा लिने गरिएको उल्लेख गर्दै उनले यो सोच बदल्न जरुरी रहेको बताए। यसका लागि पर्यटन क्षेत्रको विकास सबैभन्दा उपयुक्त विकल्प भएको उनको भनाइ छ।
उनले यसप्रकारको पर्यटनले सम्बन्धित गन्तव्यमा आर्थिक गतिविधि बढ्नुका साथै राजगारी सिर्जना हुने र विदेश जाने युवालाई स्वदेशमै रोक्न सकिने धारणा राखे।
सो अवसरमा वीरेन्द्रनगरका मेयर मोहनमाया भण्डारी (ढकाल)ले बुलबुले तालमा मोटरबोट सञ्चालनमा आएपछि यहाँको आर्थिक गतिविधि बढेको जनाइन्।
उनले विगतमा दैनिक मुस्किलले दुई हजार रुपैयाँ राजस्व संकलन हुने गरेकोमा अहिले दैनिक ४० हजारसम्म राजस्व संकलन भइरहेको जानकारी बताइन्।
बुलबुले ताल क्षेत्रमा प्रवेशका लागि नगरपालिकाले प्रतिव्यक्ति २५ रुपैयाँ लिँदै आएको छ। प्रमुख भण्डारीले मोटरबोट सञ्चालनपछि नगरापालिकाले वार्षिक ५० लाख रुपैयाँ राजस्व संकलन गर्ने अवस्था आएको उल्लेख गरे।
मोटरबोट कम्पनी बोटेबोराका सञ्चालक विष्णु ढकालले करिब एक महिनामा पर्यटकको उल्लेख्य उपस्थितिले हौसला बढाएको बताए। ‘मोटरबोट सञ्चालनका लागि प्रदेश र स्थानीय सरकारबाट राम्रो सहयोग प्राप्त भएको छ। मोटरबोट चढ्न जुम्ला, हुम्ला, मुगुलगायत जिल्लाबाट पनि आन्तरिक पर्यटक यहाँ आउनुभएको छ’, उनले भनिन्।
उनका अनुसार गत वैशाख १२ यता ३० हजार बढीले मोटरबोटको अनुभव लिइसकेका छन्।
‘अहिलेसम्म मोटरबोट सञ्चालन राम्रोसँग भइरहेको छ, तर तालमा पानीको सतह कम भएको र साँझ नपर्दै पार्क बन्द हुने भएको समस्या भएको छ’, उनले भने, ‘तालमा पर्याप्त पानीको सुविधा उपलब्ध गराउन तथा पार्क अबेरसम्म खुला गर्ने विषयमा स्थानीय तहसम्म हामीले पहल गरिरहेका छौं। आशा छ, चाँडै त्यो पनि पूरा हुनेछ।’
बोटेबोरा कम्पनीले १ करोड ५० लाख रुपैयाँ बराबरको लगानीमा मोटरबोट सञ्चालनमा ल्याएको हो।
कम्पनीका अनुसार ताल सफा गर्न हालसम्म ८२० जना व्यक्ति खटिइसकेका छन्। यसका लागि मात्रै २५ लाख रुपैयाँ लगानी भइसकेको ढकाल बताउँछन्। तालमा रहेको फोहोर सफा गरेपछि अहिले पानीको सतह केही कम भएको छ। तालमा पर्याप्त पानीको व्यवस्थाका लागि प्रयास जारी रहेको कम्पनीले जनाएको छ।
हाल कम्पनीले दुई वटा १० सिटे र एउटा आठ सिटे गरी तीन वटा मोटरबोट सञ्चालन गर्दै आएको छ। कम्पनीका अनुसार मोटरबोट चढ्न प्रतिव्यक्ति २ सय र बच्चा साथ भए २५० रुपैयाँ शुल्क लाग्छ।
कार्यक्रममा मुख्यमन्त्री कँडेलसँगै प्रदेशसभाका सभामुख नन्दा गुरुङ, उद्योग, पर्यटन, वन तथा वातावरणमन्त्री दुर्गबहादुर रावत, भूमि व्यवस्था, कृषि तथा सहकारीमन्त्री विनोदकुमार शाह, वीरेन्द्रनगरका मेयर भण्डार, उपप्रमुख नीलकण्ठ खनाल, तीन वटै सुरक्षा निकायका प्रमुख, विभिन्न वडाका अध्यक्ष र उपाध्यक्षलगायत उपस्थित थिए।
