काठमाडौं । बिहान ११ बजेदेखि संसद् भवन नयाँ बानेश्वरमा प्रतिनिधिसभा बैठक सुरू भएकाे छ।
बजेटमाथिकाे सामान्य छलफल सकिएसँगै आजदेखि बैठकमा विनियोजन विधेयक, २०८१ को विभिन्न शीर्षकमाथि मन्त्रालयगत छलफल हुने कार्यसूची छ।
बजेटमाथि सामान्य छलफल सकिएलगत्तै आजदेखि मन्त्रालयगत छलफल सुरु भएको हो। असार ७ सम्म बजेटको शीर्षकगत छलफल चल्नेछ भने सोही दिन बजेट पारित गर्ने कार्यक्रम तय भएको संसद् सचिवालयले जनाएको छ।
सरकारले आगामी आर्थिक वर्षको बजेट असार ७ मा पारित गर्ने तयारी गरेको छ। प्रतिनिधिसभाबाट असार ७ मा पारित गर्ने गरी मंगलबारदेखि मन्त्रालयगत छलफल सुरु गरेको हो। अर्थमन्त्री वर्षमान पुनले जेठ १५ मा आगामी आर्थिक वर्षका लागि १८ खर्ब ६० अर्ब ३० करोड रुपैयाँको बजेट ल्याएका थिए।
आज वन तथा वातावरण, युवा तथा खेलकुद, शिक्षा, विज्ञान तथा प्रविधि र श्रम रोजगार तथा सामाजिक सुरक्षा मन्त्रालय अन्तर्गत विभिन्न शीर्षकमाथि छलफल हुने संसद सचिवालयले जनाएको छ।
बैठकमा सांसद प्रेम सुवालले ‘विनियोजन विधेयक, २०८१ अन्तर्गत वन तथा वातावरण मन्त्रालय, युवा तथा खेलकुद मन्त्रालय, शिक्षा, विज्ञान तथा प्रविधि मन्त्रालय र श्रम, रोजगार तथा सामाजिक सुरक्षा मन्त्रालय शीर्षकको खर्च रकममा उल्लिखित रकम घटाइयोस्’ भनी खर्च कटौतीको प्रस्ताव प्रस्तुत गर्ने छन्।
सांसद अमरेश कुमार सिंहले उक्त मन्त्रालयहरु शीर्षकको खर्च रकम घटाइ एक रुपैयाँ गरियोस भनी खर्च कटौतीको प्रस्ताव प्रस्तुत गर्ने कार्यसूची छ। सांसद पुष्पबहादुर शाह, बद्री पाण्डे, रमा कोइराला पौड्याल, संजयकुमार गौतमले पनि खर्च कटौतीको प्रस्ताव प्रस्तुत गर्नेछन्।
यस्तै, सभामुख देवराज घिमिरेले राष्ट्रपतिको कार्यालय तथा प्रधानमन्त्रीको कार्यालयबाट प्राप्त कार्यभार थपसम्बन्धी पत्रको व्यहोरा पढेर सुनाउने कार्यक्रम छ।
