काठमाडौं। उद्योग, वाणिज्य तथा आपूर्तिमन्त्री दामोदर भण्डारीले खाद्य व्यवस्था तथा व्यापार कम्पनीको संरचना सुधार्न निर्देशन दिएका छन्।
मन्त्रालयका उद्योग सचिव कृष्ण राउत र वाणिज्य सचिव दिनेशकुमार घिमिरेसहित आज अनुगमनका लागि खाद्य व्यवस्थाको मुख्यालय पुगेका मन्त्री भण्डारीले सरकारको ठूलो लगानी रहेको कम्पनीलाई सुधार्न कर्मचारीलाई निर्देशन दिएका हुन्।
उनले भने, ‘सरकारको स्वामित्व छ, निजी क्षेत्रसित प्रतिस्पर्धा गरेर जनताको सेवा गर्नु छ, परम्परागत रूपले कम्पनी चलाउन सकिँदैन। संरचनागत सुधार गर्नुस्, कर्मचारीले इमानदार भएर काम गर्नुस्, काखापाखा कसैलाई गरिँदैन, मन्त्रालयबाट, काम गर्ने नियत नहुनेले मार्गप्रशस्त गरिदिनुस्।’
तत्कालीन नेपाल खाद्य संस्थान र नेसनल ट्रेडिङ एकापसमा गाभिए पनि कानुनी रूपमा देखिएको समस्या समाधानमा मन्त्री भण्डारीले चासो व्यक्त गरे।
उनले नेपाली वस्तु उत्पादन तथा बजारीकरण गर्न समेत कम्पनीका कर्मचारीलाई निर्देशन दिएको मन्त्रीका स्वकीयसचिव आनन्दप्रसाद भट्टले जानकारी दिए।
सो क्रममा सचिवद्वय राउत र घिमिरेले मन्त्रालयबाट कम्पनी सुधारका लागि कुनै पनि नीतिगत समस्या नहुने भएकाले संरचना सुधार गर्न निर्देशन दिए।
