कर्णाली प्रदेशको बेरुजु चार अर्ब

अर्थतन्त्र

गृहपृष्ठ
अर्थतन्त्र

कर्णाली प्रदेशको बेरुजु चार अर्ब

क्यापिटल नेपालमंगलबार, जेठ १५, २०८१

सुर्खेत । कर्णाली प्रदेशमा अनियमित ढङ्गले रकम खर्च गर्ने प्रवृत्ति बढेको देखिएको छ। महालेखा परीक्षकको ६१औं प्रतिवेदनअनुसार कर्णाली प्रदेश सरकारको बेरुजु रकम बढेको देखिएको हो।

प्रदेश सरकार र अन्य मातहतका सरकारी कार्यालयको बेरुजु रकम करिब चार अर्ब पुगेको छ। प्रतिवेदनअनुसार कर्णाली प्रदेश सरकार र मातहतका निकायको बेरुजु रकम तीन अर्ब ९४ करोड ८२ लाख ५४ हजार पुगेको हो। आर्थिक वर्ष २०७८/७९ सम्म कर्णाली प्रदेशको कूल बेरुजु दुई अर्ब ९८ करोड ५० लाख दुई हजार रकम रहेको थियो।

आव २०७९/८० मा मात्रै ९६ करोड ७७ लाख ५२ हजार रकम बेरुजु थप भएको महालेखा परीक्षकको प्रतिवेदनमा जनाइएको छ। प्रदेश सरकार र मातहतका कार्यालय गरी एक सय ५५ कार्यालयको ३७ अर्ब ३३ करोड ६८ लाख ९७ हजारको लेखापरीक्षण गरिएकामा ९६ करोड ७७ लाख ५२ हजार बेरुजु देखिएको हो।

महालेखा परीक्षकको कार्यालयले सार्वजनिक गरेको ६१औं वार्षिक प्रतिवेदनअनुसार सात वटा प्रदेशमध्ये कर्णालीको बेरुजु देशभरकै दोस्रो नम्बरमा रहेको बताइएको छ। कर्णालीको दुई दशमलव ५९ प्रतिशत बेरुजु रहेको छ।

प्रकाशित मिति: मंगलबार, जेठ १५, २०८१ १३:५५

प्रतिक्रिया दिनुहोस्