सडक विभागले निर्माण व्यवसायीलाई भुक्तानी गर्नुपर्ने दायित्व पौने ४ अर्ब

अर्थतन्त्र

गृहपृष्ठ
अर्थतन्त्र

सडक विभागले निर्माण व्यवसायीलाई भुक्तानी गर्नुपर्ने दायित्व पौने ४ अर्ब

क्यापिटल नेपालसोमबार, जेठ १४, २०८१

काठमाडौं। सडक विभागले निर्माण व्यवसायीलाई भुक्तानी गर्नुपर्ने दायित्व पौने ४ अर्ब पुगेको छ। यो तथ्यांक २०८० असारसम्मको रहेको महालेखा परीक्षकको ६१औं प्रतिवेदनमा उल्लेख छ। चालू आर्थिक वर्षमा भुक्तनी हुनुभन्दा दयित्व अझ थपिएको विभागकै अधिकारीहरु बताउँछन्।

गत असारसम्म पौने ४ अर्ब अर्थात् ३ खर्ब ७२ करोड रुपैयाँ भुक्तानी दायित्व सिर्जना भएको थियो। यसमध्ये १ अर्ब ७१ करोड रुपैयाँको स्रोत व्यवस्थापन भए पनि महालेखाको ६१औं प्रतिवेदन तयार गर्दासम्म भुक्तानी हुन सकेको छैन। भुक्तानी दायित्व सिर्जना भएको बाँकी २ अर्ब १ करोड रुपैयाँको स्रोत व्यवस्थापनै भएको छैन।

आर्थिक कार्यविधि २०७७ को नियम २१ अनुसार केन्द्रीय निकायले बजेट प्रस्ताव गर्दा सो आर्थिक वर्षमा खर्च हुने प्रतिबद्धतालाई बजेट विनियोजन गरेपछि मात्रै अन्य कार्यक्रममा बजेट प्रस्ताव गर्नुपर्ने व्यवस्था छ।

विगत वर्षमा खरिद व्यवस्थापनबाट सिर्जित दायित्वअनुसार बजेट विनियोजन नभएको अवस्थामा थप स्रोत सुनिश्चितताबाट दायित्व रकम बढ्दै गई बजेट अभावका कारण योजना कार्यान्वयनमा असर परेको महालेखाले औंल्याएको छ।

मन्त्रालयले सिर्जित दायित्व भुक्तानीका लागि बजेट छुट्याएपछि मात्रै अन्य कार्यक्रममा बजेट विनियोजन गर्न महालेखा परीक्षकको कार्यालयले भौतिक पूर्वाधार तथा यातायात मन्त्रालय र सडक विभागलाई सुझाएको छ।

प्रकाशित मिति: सोमबार, जेठ १४, २०८१ १६:२४

प्रतिक्रिया दिनुहोस्