काठमाडौं । सहकारी अपचलन प्रकरणमा संसदीय छानबिन समिति गठनको माग गर्दै प्रमुख प्रतिपक्षी नेपाली कांग्रेसले अवरुद्ध गर्दै आएको संसद सुचारु गर्न मुख्य दलका शीर्ष नेता सम्मिलित बालुवाटार बैठक निष्कर्शविहीन भएको छ।
सत्ता पक्षले संसद गतिरोध अन्त्यका लागि गरेको आग्रह संसदीय छानबिन समिति गठन नहुन्जेल अवरोध जारी राखिने कांग्रेसले अडान लिएपछि बैठक निष्कर्शविहीन भएको हो। यद्यपि बेलुकीसम्म सहमति जुटाउने वातावरण तयार गरेर पुन: बैठक बस्ने सहमति भएको कांग्रेसका मुख्य सचेतक रमेश लेखकले बताए।
आज बिहानको बैठकमा प्रधानमन्त्री पुष्पकमल दाहाल, कांग्रेस उपसभापति पूर्णबहादुर खड्का, राष्ट्रिय सभामा कांग्रेस नेता कृष्ण सिटौला, महामन्त्री गगन थापा, प्रमुख सचेतक रमेश लेखक, सांसद ज्ञानेन्द्रबहादुर कार्की र कार्यदलका सदस्य जीवन परियार सहभागी थिए।
यस्तै बैठकमा एमालेबाट कानुन मन्त्री पदम गिरी, प्रमुख सचेतक महेश बर्तौला, माओवादी केन्द्रबाट अर्थमन्त्री वर्षमान पुन, प्रमुख सचेतक हितराज पाण्डे सहभागी थिए।
बैठकमा राष्ट्रिय स्वतन्त्र पार्टी (रास्वपा) सभापति एवं उपप्रधान तथा गृहमन्त्री रवि लामिछाने, उपसभापति स्वर्णिम वाग्ले, प्रमुख सचेतक सन्तोष परियार सहभागी थिए।
प्रधानमन्त्रीले सत्ता पक्ष र प्रतिपक्षसँग अलगअलग अनौपचारिक औपचारिक छलफल गरे पनि निष्कर्षमा पुग्न नसकेको लेखकले बताए।
