प्रतिपक्षीको नाराबाजीकै बीच नीति तथा कार्यक्रम पारित

अर्थतन्त्र

गृहपृष्ठ
अर्थतन्त्र

प्रतिपक्षीको नाराबाजीकै बीच नीति तथा कार्यक्रम पारित

क्यापिटल नेपालआइतबार, जेठ १३, २०८१

काठमाडौं । प्रतिनिधि सभाले आगामी आर्थिक वर्षको नीति तथा कार्यक्रम पारित गरेको छ। प्रतिनिधि सभामा प्रमुख प्रतिपक्षी दलसहितका विपक्षीहरूले नाराबाजी गरिरहे पनि सभामुख देवराज घिमिरेले प्रतिनिधि सभाको काम कारबाहीलाई अघि बढाएका हुन्।

ध्वनी मतका आधारमा सभामुख घिमिरेले नीति तथा कार्यक्रम पारित भएको घोषणा गरे। त्यसअघि नेपाल मजदुर किसान पार्टीका सांसद प्रेम सुवाल र राष्ट्रिय जनमोर्चा नेपालका सांसद चित्रबहादुर केसीले राखेको संशोधन प्रस्ताव पनि ध्वनी मतले अस्वीकार गरेको थियो। सभामुख घिमिरेले केसी र सुवालको प्रस्तावलाई निर्णयार्थ छुट्टाछुट्टै पेस गरेका थिए।

यसअघि विरोधकै बीच नीति तथा कार्यक्रममाथी भएको छलफलमा उठेका प्रश्नहरूको जवाफ प्रधानमन्त्री पुष्पकमल दाहालले दिएका थिए।

त्यसअघि नीति तथा कार्यक्रमको समर्थनमा नेकपा एमालेका सांसद विष्णुप्रसाद पौडेल, नेकपा माओवादी केन्द्रका सांसद जनार्दन शर्मा र राष्ट्रिय स्वतन्त्र पार्टीका सांसद डा. स्वर्णिम वाग्लेले नीति तथा कार्यक्रमका पक्षमा वकालत गरेका थिए।

सहकारी ठगी प्रकरणलाई मुद्दा बनाएर हिउँदे अघिवेशनमा चैत २ गतेदेखि संसद अवरुद्ध गर्दै आएको कांग्रेसले बजेट अधिवेशन पनि प्रभावित बनाउने प्रयास गरिरहेको छ।

वैशाख २८ गतेदेखि सुरु भएको संघीय संसदका गतिविधि सहज ढंगले अघि बढिरहेको छैन। जेठ १ गते राष्ट्रपति रामचन्द्र पौडेललाई नीति तथा कार्यक्रम पेस गर्न दिए पनि कांग्रेसले अन्य गतिविधि हुन दिएको छैन। तर, विरोधकै बीच जेठ ८ गते राष्ट्रपतिलाई धन्यवाद प्रस्ताव पारित गर्ने लगायतका काम भएको थियो।

प्रकाशित मिति: आइतबार, जेठ १३, २०८१ १३:१७

प्रतिक्रिया दिनुहोस्