राजनीति

कांग्रेस नाराबाजीबीच ८ अध्यादेश पेस, जेठ ११ देखि नीति तथा कार्यक्रममाथि छलफल

क्यापिटल नेपालमंगलबार, जेठ ८, २०८१

काठमाडौं । मुख्य प्रतिपक्षी नेपाली कांग्रेसको अवरोधबीच प्रतिनिधिसभा बैठक जेठ ११ सम्म स्थगित भएको छ। सभामुख देवराज घिमिरेले जेठ ११ मा बस्ने गरी बैठक स्थगित गरेका हुन्।

मंगलबारको बैठकमा कांग्रेसले सहकारी प्रकरणमा संसदीय छानबिन समिति गठनको माग गर्दै नाराबाजी र वेल घेराउ गरे पनि सभामुख घिमिरेले राष्ट्रपति रामचन्द्र पौडेलले गत जेठ १ मा सरकारको नीति तथा कार्यक्रम वाचन गरेकामा धन्यवादको प्रस्तावसमेत पारित भएको घोषणा गरे।

प्रधानमन्त्री पुष्पकमल दाहालले धन्यवाद प्रस्ताव टेबल गरेकामा प्रस्ताव सर्वसम्मत पारित भएको सभामुख घिमिरेले कार्यसूची प्रवेशका क्रममा बताए।

बैठकमा गत वैशाख १६/१७ मा आयोजित लगानी सम्मेलनलाई लक्षित गरेर सरकारले अध्यादेशमार्फत राष्ट्रपतिबाट स्वीकृत गराएको लगानीसम्बन्धी ८ वटा ऐन उद्योग, वाणिज्य तथा आपूर्तिमन्त्री दामोदर भण्डारीले संसद्मा पेस गरे। मन्त्री भण्डारीले लगानी सहजीकरणसम्बन्धी अध्यादेश प्रतिनिधिसभा बैठकमा पेस गरेका हुन्।

गृहमन्त्री रवि लामिछानेले राजनीतिक दलसम्बन्धी संशोधन विधेयक फिर्ता लिन राखेको प्रस्ताव पनि प्रतिनिधिसभाले पारित गरेको घोषणा सभामुख घिमिरेले गरे। जेठ ३ को मन्त्रिपरिषद् बैठकले बैठकले राजनीतिक दलसम्बन्धी दोस्रो संशोधन विधेयक २०८० लाई फिर्ता लिने निर्णय गरेको थियो।

सभामुख घिमिरेले राजनीतिक दलसम्बन्धी विधेयक २०८० लाई फिर्ता लिने प्रस्ताव बहुमतले स्वीकृत भएको घोषणा गरेका छन्।