काठमाडौं। जनता समाजवादी पार्टी नेपालका अध्यक्ष तथा उपप्रधान एवं स्वास्थ्य तथा जनसंख्यामन्त्री उपेन्द्र यादव संयुक्त राष्ट्रसंघीय जनसंख्या तथा विकास आयोगको ५७औं बैठकमा भाग लिएर स्वदेश फर्किएका छन्।
राष्ट्रसंघको मुख्यालय न्युयोर्कमा रहँदा नेपालमा उपेन्द्रको पार्टी जसपा नेपालबाट अशोक राई नेतृत्वको समूहले जसपा गठन गरेर वैशाख २४ मै वैधानिकता पाइसकेको छ।
पार्टीका १२ सांसदमध्ये ७ जना राई नेतृत्वको जसपामा लागेका छन्। पार्टीमा फुट आएसँगै उपेन्द्र नेतृत्वको जसपा नेपालमा ५ जना मात्र सांसद रहेका छन्।
स्वदेश फर्किएलगत्तै अध्यक्ष यादवले पार्टीभित्रको विभाजनबारे नेकपा माओवादी केन्द्रका अध्यक्षसमेत रहेका प्रधानमन्त्री दाहाललाई भेटेको बुझिएको छ।
जसपा नेपाल टुक्रिएपछि प्रचण्ड नेतृत्वको सरकार के हुने भन्नेबारे अड्कलबाजी सुरु भएका छन्। राई नेतृत्वको जनता समाजवादीलाई निर्वाचन आयोगले सोमबार नयाँ दलको मान्यता दिएको थियो।
जसपा नेपालले भने संसद अधिवेशन आह्वान भइसकेको र दल विभाजनसम्बन्धी अध्यादेश खारेज रहेको अवस्थामा नयाँ दल दर्ता नहुने बताइरहेको छ। जसपा नेपालले कानुनी उपचार खोज्ने विषयमा अनौपचारिक कुराकानी भइरहेको जनाएको छ। सोमबार राती नेपाल आइपुगेका यादव मंगलबार बिहानै प्रधानमन्त्री प्रचण्ड भेट्न बालुवाटार पुगेका हुन्।
‘अवैधानिक निवेदनका आधारमा दल विभाजन हुने अवस्था नरहेको हुँदा पार्टीका सम्पूर्ण केन्द्रीय सदस्यलगायत सबैमा कुनै पनि भ्रममा नपरी आ–आफ्नो पदीय जिम्मेवारी निर्वाह गर्नुहुन अनुरोध छ,’ प्रवक्ता मनिष सुमनले सोमबार जारी गरेको विज्ञप्तिमा उल्लेख छ।
यादवले राष्ट्रसंघका महासचिव एन्टोनियो गुटरेस तथा ७८औं महासभाका अध्यक्ष डेनिस फ्रान्सिससँग बेग्लाबेग्लै भेटवार्ता गरी सबल र प्रभावकारी संयुक्त राष्ट्रसंघ बनाउन नेपालको पूर्ण सहयोग रहने बताएका थिए।
आयोग बैठकमा उपप्रधानमन्त्रीले जलवायु बैठकमा स्वास्थ्यमन्त्री यादवले नेपालको स्वास्थ्य क्षेत्र, विशेषगरी मातृ तथा प्रजनन स्वास्थ्यमा भएको सुधार, दिगो विकासका लक्ष्य प्राप्ति तथा जलवायु परिवर्तनका असरबारे जानकारी दिँदै स्वास्थ्य क्षेत्रको सुधारका लागि राष्ट्रहरूबीच विश्वास, सद्भाव, ऐक्यबद्धता र सहयोग आदानप्रदान महत्त्वपूर्ण हुने बताएका थिए।
