त्रिवेणी। बर्दघाट सुस्तापूर्व नवलपुरको कावासोती–१७ का मीनबहादुर महतोले धान लगाउने खेतमा खरबुजा लगाएर अरूलाई लोभ्याउने गरी आम्दानी गरेका छन्।
करिब ३ बिघा जग्गा भाडामा लिएर तरकारी खेती गर्दै आएका उनले यसपटक खरबुजा फलाएका छन्। 'पहिला तरकारी लगाउने गर्थेँ, बजार नपाएपछि खरबुजा लगाएँ,' उनले सुनाए, 'यसबाट राम्रो आम्दानी भएको छ।'
वरपर कतै चैतेधान कतै मकै लगाइएको छ। हाल खरबुजा लगाइएको क्षेत्रमा यसअघि करेला खेती गरेकामा यसपटक खरबुजा लगाएर सफल भएको महतोले बताए। सरस्वती जातको खरबुजा लगाएका उनले ६० दिनपछि उत्पादन भएको र हालसम्म ८० क्विन्टल हाराहारीमा बिक्री गरेको बताए। चैतको पहिलो हप्तादेखि उत्पादन सुरु भएकामा जेठसम्म खरबुजा फल्ने उनले बताए।
अहिलेको सिजनबाट ६ लाख रुपैयाँ आम्दानी हुने अनुमान गरिएकामा उत्पादन बढेकाले सोचेभन्दा धेरै बिक्री हुने र आम्दानीसमेत बढ्ने अपेक्षा उनले गरेका छन्। आफूले उत्पादन गरेको खरबुजा बिक्रीमा कुनै समस्या नभएको महतोले बताए। जिल्लाको स्थानीय बजारमा खरबुजा खपत हुँदै आएको छ।
आफूहरूले कुनै विषादी प्रयोग नगरी उत्पादन गरेकाले बारीबाटै दैनिकजसो दुई क्वीन्टल बिक्री हुने गरेको उनले बताए। 'यसलाई खासै औषधि हाल्नुपरेन, प्रांगारिक मल नै धेरै प्रयोग गरियो,' उनले भने, 'उत्पादन पनि सोचेभन्दा धेरै भयो, स्थानीय उत्पादन भनेपछि बारीबाटै किनेर लैजाने धेरै हुन्छन्।'
खरबुजाखेतीमा खासै खर्च र मेहनत गर्नु नपरेकाले उत्पाद तथा आम्दानीमा खुसी रहेको उनको भनाइ छ। रोजगारीका लागि सिंगापुर र साउदी अरबमा ७ वर्ष बिताएका महतोले अहिले आफ्नो फार्ममा ९ जनालाई रोजगारी दिएका छन्।
कावासोती नगरपालिका–१७ का वडासदस्यसमेत रहेका उनी विगत ६ वर्षदेखि व्यावसायिक कृषिमा लागेका छन्। 'रोजगारीका लागि विदेश नै जानुपर्छ भन्ने छैन,' उनले भने, 'कृषिकर्मबाट पनि कमाउन सकिन्छ।' रासस
