मन्थली। गर्मी बढेसँगै रामेछापमा जुनारको जुस बिक्री बढेको छ। स्थानीय उत्पादन यहाँका होटल तथा पसलमा मात्र होइन यहाँ आउने जो कोहीले कोसेलीका रूपमा पनि जुस खरिद गर्न थालेका छन्।
विशेष गरी काठमाडौँ र तराईका विभिन्न जिल्लामा कोसेलीका रुपमा लैजानका लागि बढी बिक्री हुने गरेको जुस जिल्लाका दुईवटा उद्योगबाट दैनिक ३ लाख ५० हजार रुपैयाँ बराबरको बिक्री हुने गरेको उत्पादकले बताएका छन्।
जिल्लामा निजी क्षेत्रका डिलक्स एग्रो फरेस्ट्री प्रडक्ट र मन्थली डिलक्स एग्रो फरेस्ट्रीले ‘स्क्वास’ बनाएर बिक्री गरेका छन्। दुवै कम्पनीले जुनारबाहेक कागती, किवी, अमला र बेलका जुस पनि उत्पादन गर्दै आएका छन्। जिल्लामा जुनारको स्क्वास प्रतिलिटर १५० रुपैयाँ र किवीको प्रतिलिटर २०० रुपैयाँमा बिक्री हुने गरेको छ।
एक भागमा चार भाग पानी मिसाएर पिउनुपर्ने स्क्वास रामेछाप जिल्ला सदरमुकाम मन्थलीका साथै जिल्लाका विभिन्न बजार केन्द्र, सिन्धुलीको खुर्कोटलगायत विभिन्न बजार, दोलखा, ओखलढुंगा, काठमाडौँ, ललितपुर भक्तपुर र तराईका जिल्लामा कोसेलीका रुपमा लैजाने गरिएको छ। दैनिक दुवै कम्पनीबाट ३ लाख ५० हजार रुपैयाँ बराबरको बिक्री हुने गरेको डिलक्स एग्रो फरेस्ट्री प्रालि रामेछापका सञ्चालक रामबाबु गिरीले बताए।
त्यसैगरी गर्मीको समयमा चिया पिउनेको भन्दा बढी जुस पिउने आफ्नो कम्पनीमा आइर जुस खाने र किनेर लैजाने गरेको मन्थली डिलक्स एग्रो फरेस्ट्री प्रालि रामेछापका सञ्चालक लोकेन्द्र श्रेष्ठले बताए। 'मल्टिनेसनल कम्पनीबाट उत्पादित कोक फेन्टाजस्ता पेय पदार्थलाई निरुत्साहित गरी स्थानीय उत्पादनलाई प्रवर्द्धन गर्न राज्यले सहयोग गरेका बिक्री अझ बढ्ने थियो,' उनले भने, ' तर आफूजस्ता युवा उद्यमीलाई राज्यले कुनै सहयोग गरेको छैन।'
मन्थली नगरपालिका प्रमुखले युवा उद्यामीलाई बैंकसँग समन्वय गराइदिएर बिना धितोमा वा मुनासिब ब्याजमा उद्यम कर्जाका लागि सिफारिस गर्ने गरेको बताए। कात्तिकदेखि मङ्सिर पुससम्म जुनारको सिजनमा कृषकसँग बगैंचा नै खरिद गरेर त्यसलाई प्रशोधन गरी झोल बनाएर राख्ने अनि फागुनदेखि असोजसम्म आवश्यक कच्चा पदार्थको प्रयोग गरी स्क्वास बनाएर बिक्री हुँदै आएको छ।
स्थानीयस्तरमा पाइने जुनार, कागती, किवी अमला, बेलको झोलबाट स्क्वास बनाउने गरिएको छ। गर्मी बढेसँगै जिल्लामा यसको राम्रो व्यापार हुने गरेको स्थानीय व्यवसायी चन्द्रबहादुर श्रेष्ठले बताए।
स्थानीयस्तरमा उत्पादित जुनार, अमला कागती, किवी, बेलजस्ता वस्तुको स्क्वास बनाएर यहाँका किसान लाभान्वित भएका छन्। यसबाट स्थानीयलाई रोजगारी मिल्ने तथा यस्ता उत्पादनको प्रवर्द्धनका लागि सम्बन्धित निकायले पहल गर्नुपर्ने कृषि व्यवसायी गुञ्ज कार्की बताउँछन्। रासस
